ԱԳ նախարարի տեղակալ Շավարշ Քոչարյանը այսօր ԱԺ-ում բյուջեի նախագծի քննարկման ավարտից հետո պատասխանեց լրագրողների հարցերին, մասնավորապես Հայաստանի՝ ԵՏՄ անդամակցության վերաբերյալ. «Որևէ փոխզիջում չի եղել: Նազարբաևի կողմից բարձրացվում էր այն հարցը, որ հստակեցվի՝ Հայաստանը անդամակցում է ԵՏՄ-ին Ղարաբաղի հետ միասի՞ն, թե՞ ոչ, մենք ընդամենը վերահաստատել ենք այն դիրքորոշումը, որ ՀՀ-ն ունեցել է անկախությունից ի վեր, որ ԼՂՀ-ն Հայաստանի մաս չի կազմում»,- ասաց նա՝ հավելելով, որ ընդամենը վերահաստատել ենք մեր դիրքորոշումը: Նրա խոսքով՝ մաքսակետի հարցը բանակցությունների առարկա չի եղել, այդպիսի պահանջ չկա, և պայմանագրում որևէ կետ չկա, որ մենք պարտավոր ենք որևէ տեղ մաքսակետ դնել, դա մեր անդամ երկրների սուվերեն իրավունքն է: Իսկ ինչ վերաբերում է գործող մաքսակետերին, ապա, Շավարշ Քոչարյանի խոսքով, դրանք դիտարկվել են հանձնաժողովի կողմից և համարել են, որ մենք պատրաստ ենք: Որևէ այլ պահանջ գոյություն չունի, նշեց նա:
Անդրադառնալով Ֆրանսիայի եռակողմ հանդիպմանը՝ նա նշեց, որ Ադրբեջանի դիրքորուշումը քանի դեռ այնպիսին է, ինչպիսին կա, շարունակում է խոչընդոտ լինել առաջընթացի համար: Ըստ նրա՝ պետք չէ առանձնապես տեղեկացված լինել՝ հասկանալու համար, որ առաջընթաց անհնարին է, երբ կողմերից մեկն ասում է ամեն ինչ կամ ոչինչ: Առաջընթացի համար պետք է համապատասխան մթնոլորտ: Ադրբեջանում բացահայտ հայտարարվում է, որ հայերը թշնամի են:
Անդրադառնալով Ադրբեջանին Ռուսաստանի կողմից սպառազինմանը, թե ինչ քայլ է ձեռնարկում ԱԳՆ՝ նա նշեց, որ որևէ քայլ չեն ձեռնարկում, Ռուսաստանը վաճառում է իր զենքը և տարբեր գներով և ոչ միայն Ադրբեջանին. «Իհարկե, սա միշտ եղել է մեր բանակցային սեղանին, բայց խնդիրը պետք է նայել ավելի լայն համատեքստում, թե մենք ինչ ենք ստանում, ինչ գներով և ինչպես ենք կարողանում ապահովել մեր ռազմական բալանսը»:
Հավասարակշռությունը, ըստ նրա, միայն զենքով չէ, եթե միայն զենքով լիներ, մենք չէինք ունենա ղարաբաղյան հաղթանակ: Նա հիշեցրեց, որ ռազմական ուղղաթիռներով Ադրբեջանը հիսունից ավելի ռազմական ուղղաթիռ ուներ, մենք՝ ոչ մի հատ, ընթացքում չորս հատ հաջողվեց մեզ ձեռք բերել: Ռազմական հավասարակշռությունը դա և տեխնիկան է, ռազմական դիրքը, բանակի կազմակերպվածությունը: «Մենք տեսանք, թե ինչպես օգոստոսին հատուկ ջոկատայինների ատամները ջարդեցին մեր զորակոչիկները, օգոստոսը մի բան ցույց տվեց, որ բոլոր քաղաքական ուժերը և ՀԿ-ները հանդես եկան որպես մեկ բռունցք»:
Ավելին՝ տեսանյութում: