«Օրենսդրական գործընթացը Հայաստանում պետք է ավելի ճկուն և մասնակցային լինի»,- ասված է ԵԱՀԿ/ԺՀՄԻԳ-ի կողմից ՀՀ արդարադատության նախարարության պաշտոնական խնդրանքով ներկայացված գնահատման զեկույցում: Այս զեկույցում անդրադարձ է կատարվում մեծ քանակությամբ օրենքների, որոնք ընդունվում են տարեկան կտրվածքով՝ արդյունքում ստեղծելով ծանրաբեռնվածություն կառավարության և հատկապես ԱԺ-ի համար: Գնահատման զեկույցում ԺՀՄԻԳ-ի կողմից առաջարկվում է, որ օրենսդրական քաղաքականության վերաբերյալ ավելի ինտենսիվ քննարկումներ իրականացվեն շահագրգիռ կողմերի հետ խորհրդակցությունների միջոցով, և օրենսդրության ազդեցության գնահատումներ թե՛ նախնական փուլերում և թե՛ օրենսդրական ամբողջ գործընթացի ընթացքում:
Արդարադատության նախարար Հովհաննես Մանուկյանը միջոցառման սկզբում համաձայնեց զեկույցում հնչեցված մտահոգություններին: «Պետք է փորձել գտնել այնպիսի ուղիներ, որ շտապողականությունը չվնասի ընդունվելիք օրենքի որակին»,- ասաց նախարարը:
Թեև այս զեկույցը պատրաստվել է նախարարության պատվերով, սակայն Հայաստանի հելսինկյան կոմիտեի նախագահ Ավետիք Իշխանյանի խոսքով՝ բավականին օբյեկտիվ զեկույց է, որում վեր են հանվում մի շարք խնդիրներ, և լուծումներ են առաջարկված: «Շատ դեպքերում բավականին նրբանկատորեն են ներկայացված խնդիրները, բայց տողատակից հասկանալի է դառնում, թե նրանք ինչ նկատի ունեն: Հիմնական խնդիրն այն է, որ չնայած Հայաստանում հռչակված է իշխանության տարանջատում, սակայն իրականում չկա այդ տարանջատումը: Գործադիր իշխանությունը շատ հզոր է, և չկա հակակշիռ:
Օրենսդրությունը մշակվում է կառավարությունում, իսկ ԱԺ-ն առանց մանրակրկիտ քննարկումների «դակում» է դրանք»,- «Առաջին լրատվական»-ի հետ զրույցում ասաց Իշխանյանը՝ հավելելով, որ Հայաստանի հիմնական խնդիրը բրգաձև իշխանությունն է և դրանից բխող հետևանքները: