«Ամեն մի ապրանքատեսակի համար կա որոշակի մաքսատուրք: Իրականում այսօր կա արդեն ՄՄ, ընդհանուր տնտեսական տարածք: Այսօր կա նաև տուրքերի ցանկը, և սրանով է պայմանավորված, որ Հայաստանը տարբեր ապրանքատեսակների համար կորզել է բացառություններ. ութ հարյուրից ավելի ապրանքատեսակների համար պահպանում ենք այն ռեժիմը, որը ունեցել ենք: Մնացածում գործելու են այն թվերը, որը մեզ հայտնի է. ամեն մի ապրանքի նկատմամբ փոփոխությունը նշանակում է՝ ընդունվում է բոլոր անդամ պետությունների համաձայնությամբ»,- այսօր ԱԺ-ում բյուջեի նախագծի քննարկմանը նշեց ԱԳ նախարարի տեղակալ Շավարշ Քոչարյանը:
Իրականում, նրա դիտարկմամբ, մեզ համար ընդհանուր առմամբ այդ ճանապարհային քարտեզին անցնելը դյուրին էր այն պատճառով, որ մենք համագործակցելով ԵՄ-ի հետ՝ լուրջ բարեփոխումների էինք ենթարկել մեր տնտեսությունը:
«Բացի այդ՝ երբ խոսում ենք մաքսային արժեքների մասին, մենք, լինելով Առևտրի համաշխարհային կազմակերպության անդամ, ավելի լիբերալ ենք: Ստացվում է՝ մենք ավելի մոտ ենք այդ չափանիշներին, քան իրենք: Չեմ բացառում այն դեպքերը, երբ, օրինակ, մենք հարց ենք տալիս՝ ձեզ մոտ այս դրույթը այսպիսին է, ձեզ մոտ՝ այսպիսին, եթե մենք հիմա հետ գանք ու ձեզ հետ գնանք, որքանո՞վ է տրամաբանական, ավելի լավ չէ՞ դուք գաք հասնեք մեզ, և նրանք ընդունում են»,- ասաց նա:
«Մենք մեր կողմից քայլ կատարել ենք, պատասխան քայլի համար աշխատանք է պետք: Տարբեր հարցերում նրանք մոնիտորինգ են անում, թե որքանով ենք մենք պատրաստ, որից հետո կկազմվի ծրագիր»,- անդրադառնալով ԵՄ-ի հետ հետագա համագործակցությանը՝ ասաց Շավարշ Քոչարյանը:
Լուսանկարը՝ Armenpress-ի
