ԱԺ-ում 2015-ի բյուջեի նախագծի քննարկմանը ԱԳ նախարարի տեղակալ Շավարշ Քոչարյանը նշեց, որ Հայաստանը եղել և շարունակում է մնալ ԵՄ-ի կարևոր գործընկերը: Համագործակցությունը շարունակվում է տարբեր ոլորտներով, Հայաստանը շարունակում է ակտիվ մասնակցություն ունենալ Արևելյան գործընկերության բազմակողմ ձևաչափի շրջանակում գործող պլատֆորմներում: Մեր հարաբերությունները, նրա խոսքով, զարգանում են ինչպես պարբերական խորհրդակցությունների, այնպես էլ ոլորտային ուղղություններով: Մասնավորապես՝ շարժունակության խթանում, ինչը վերաբերում է վիզաների դյուրացման ծրագրին, ՀՀ և ԵՄ միջև մարդու իրավունքների խրախուսմանը, 2009-ից գործում է մարդու իրավունքների երկխոսությունը, ԵՄ ծրագրերին Հայաստանի մասնակցությունը: Նա տեղեկացրեց, որ առաջիկայում աշխատանքային քննարկումներ են իրականացվելու ԵՄ-ի հետ հետագա համագործակցության հարցի շուրջ, որին կհաջորդեն քաղաքական խորհրդակցություններ Հայաստան-ԵՄ համագործակցության նոր շրջանակի ձևավորման ուղղությամբ:
Կանխատեսելով այն տրամաբանական հարցը, թե Հայաստանի՝ ԵՏՄ անդամակցության հետ կապված ինչպես են զարգանալու մեր հարաբերությունները ԵՄ-ի հետ, Շավարշ Քոչարյանն ասաց. «ՀՀ-ն շահագրգիռ է շարունակելու խորացնել մեր համագործակցությունը ԵՄ-ի հետ՝ հաշվի առնելով այն պարտավորությունները, որոնք ունենք արդեն ԵՏՄ-ում, որպեսզի հակասություն չլինի այդ պարտավորությունների հետ: Սա նշանակում է հստակեցնել այն շրջանակը, որտեղ մենք ազատ ենք գործելու: Խոսքը վերաբերում է առևտրատնտեսական հարաբերություններին, որի ուղղությամբ նոր ձևաչափով մենք կշարունակենք մեր համագործակցությունները»:
Ինչ վերաբերում է դատական, կրթական բարեփոխումներին, այստեղ նույն թափով Հայաստանը շարունակելու է համագործակցության խորացումը:
Լուսանկարը՝ Panorama.am-ի
