Երեկ առավոտյան Մադրիդի բանտից Ռուսաստան է վերադարձել 61-ամյա «օրենքով գող» Զախարի Կալաշովը, որը հանցագործ շրջանակներում հայտնի է որպես Շաքրո Մոլոդոյ: Մոսկվայի «Դոմոդեդովո» օդանավակայանում նրան դիմավորել են ՌԴ ՆԳՆ աշխատակիցները, որոնք նրան պետք է ուղեկցեին նախարարություն՝ բարձրաստիճան պաշտոնայաների հետ զրույցի: Շաքրոյի վերադարձի հետ առաջին հերթին հույսեր են կապում՝ դադարեցնելու 7 տարի տևող կոնֆլիկտը գողական կլանների շրջանակում:
Ազգությամբ քուրդ-եզդի Զախարի Կալաշովն այն հանցավոր կայսրության լիիրավ տերն է, որի գլխին կանգնած էր Դեդ Հասանը: Անգամ Յապոնչիկի ու Դեդ Հասանի կենդանության օրոք Շաքրոն հեղինակությամբ չէր զիջում նրանց:
Իրավապահ մարմիններում Rosbalt-ի աղբյուրը պատմել է, որ ներկայումս նրա անունը Ռուսաստանում շրջանառվում է մի քանի քրեական գործերում, այդ թվում՝ իրավաբան Վլադիմիր Դուխնովի սպանության հետաքննության մեջ: Վերջինս «Կրիստալ» և Golden Palace խաղատների համասեփականատեր է:
1999թ. այդ խաղատները պաշտոնապես պատկանել են «Օպտիկալ» ընկերությանը, որի սեփականտերերի ցուցակը հետևյալ տեսքն է ունեցել. ԱՄՆ քաղաքացի Ալեքս Կրեյն (70%), Կառլեն Ազիզբեկյան (10%), Զուրաբ Ծերեթելի (9,5%), Մուսայելյան (9,5%), Վլադիմիր Դուխնով (1%):
Ալեքս Կրեյնի օգնական Լեոն Լանն ինչ-որ պահի սկսել է հեռանալ ղեկավարից և մտերմացել է «օրենքով գողերի» խմբի հետ, որոնց շարքում հատկապես առանձնացել է Կալաշովը: Այնուհետև Լեոն Լանը նոր շրջապատի շահերի համար հայտարարել է «Օպտիկալի» 70 տոկոսի նկատմամբ իր հավակնությունների մասին:
2000թ. հունվարին Դուխնովն անհետացել է, երբ հանդիպման է գնացել՝ իր մոտ ունենալով Կրեյնի, Ծերեթելիի և Մուսայելյանի բաժնետոմսերի բնօրինակները: Իրավաբանի մարմինն այդպես էլ չի հայտնաբերվել: Օպերատիվ տվյալներով՝ նա սպանվել է:
2000թ. հունիսին Վրաստանում գտնվող Ալեքս Կրեյնին է զանգահարել Շաքրոն և առաջարկել հանդիպել Թբիլիսիի «Շերաթոն Մեթեխի Պալասում»՝ քննարկելու ստեղծված իրավիճակը: Կրեյնն առևանգվել է: Նրա հարազատներից 1.2 մլն դոլարի փրկագին է պահանջվել: Գումարը ստացել են, բայց նրան՝ սպանել: Հենց այդ հանցագործության համար էլ Կալաշովը Վրաստանում դատապարտվել է 18 տարվա ազատազրկման:
Համաձայն Ռուսաստանի Քննչական կոմիտեի Մոսկվայի գլխավոր քննչական վարչության նյութերի՝ 2000թ. Կալաշովը, Լանն ու մի շարք անձինք զավթել են վերահսկողությունը երկու խաղատների գործունեության նկատմամբ՝ տարբեր կերպ չեզոքացնելով այդ հաստատությունների սեփականատերերին:
Ռուսաստանում նրան հազիվ թե դատավարություն սպասի: Իրավապահ մարմինների աղբյուրի փոխանցմամբ՝ Կալաշովը պատասխանատվության չի ենթարկվի ներկայումս առկա ոչ մի գործով: Աղբյուրի խոսքով՝ դրա համար չի կատարվել նրան հենց Ռուսաստանին, այլ ոչ թե Վրաստանին հանձնելու մեծ աշխատանքը: