Գյումրիի նախկին քաղաքապետ Վարդան Ղուկասյանն «անբարոյականություն է» համարում գործող ԲՀԿ-ական քաղաքապետ Սամվել Բալասանյանի գործելաոճը՝ այն իմաստով, որ նա քաղաքապետ է ընտրվել ՀՀԿ-ի հովանավորությամբ, բայց հիմա կանգնել է հարթակում իշխանությունների հրաժարականը պահանջող քաղաքական ուժերի կողքին:
«Այ, Հանրապետականին պետք է հարցնել, թե գո՞հ են նրա աշխատանքից, պահվածքից: «Բարգավաճին» էլ հարցրեք, բոլորին հարցրեք, տեսնենք՝ ինչ է սա, սրա արածը, պահվածքը, գործելաոճը: Ով որ նշանակեց, ով որ կողմնակից էր, որ նրան նշանակեին, ով օգնեց, նրանց բոլորին հարցրեք: Իսկ ես նմանատիպ անբարոյականությունից չեմ հասկանում: Նման գործելաոճը կարող են մեկնաբանել միայն մարդիկ, ովքեր մեկ այստեղ են, մեկ՝ այնտեղ, մեկ էլ՝ ամենուր:
Իսկ մենք մի ճանապարհ ունենք՝ խիղճը չկորցնել, սիրել երկիրը, հայրենիքը, ժողովրդին: Մնացածը ձևի, մարդկանց ապրելակերպի խնդիրն է, որն ինձ համար հասկանալի չէ, ոչ էլ ուզում եմ հասկանալ»,-«Առաջին լրատվական»-ի հետ զրույցում ասաց Վարդան Ղուկասյանը:
Մեր ճշտող հարցին՝ այսինքն՝ Բալասանյանի պահվածքն անբարոյականությո՞ւն է համարում, Ղուկասյանն արձագանքեց. «Ես արդեն ասացի այն, ինչ ասացի»:
Նշենք, որ Բալասանյանը մասնակցում էր հոկտեմբերի 24-ի հանրահավաքին: Նա կանգնած էր հարթակում, առաջին շարքում: Նրան հաջողվել էր երկու անգամ խուսափել հանրահավաքներից, բայց ամեն դեպքում հոկտեմբերի 24-ին նա հարթակում էր՝ կարկառուն ԲՀԿ-ականների կողքին:
Վարդան Ղուկասյանը չցանկացավ կարծիք հայտնել, թե հնարավո՞ր է Բալասանյանը ստիպողաբար է հարթակ բարձրացել: «Իրենից հարցրեք, թող ինքն էլ ասի՝ ստիպո՞ւմ են, թե՞ ոչ»:
Ինչ վերաբերում է եռյակի հանրահավաքներին ու իշխանափոխության մասին հայտարարություններին, ապա Գյումրիի նախկին ՀՀԿ-ական քաղաքապետի խոսքով՝ այդ հանրահավաքների արդյունքում ոչ մի բան էլ չի լինի: «Ճիշտն ասած, ես ոչ մի բանի էլ չեմ հավատում: Ինչ որ հիմա խոսվում է և արվում, ես դրան չեմ հավատում»,- ասաց նա:
Նշենք, որ Շիրակի մարզից մեծամասնականով պատգամավոր ընտրված Աշոտ Աղաբաբյանն այսօր tert.am-ի հետ զրույցում անդրադառնալով Սամվել Բալասանյանի նշանակման ժամանակ նրա թեկնածությունը պաշտպանելուն՝ արդարացել է, թե Բալասանյանին պաշտպանելուց իրենք հաշվի են առել նրա մասնագիտական որակները, ոչ թե կուսակցական պատկանելությունը, նրան մոտեցել են որպես մարդու, ոչ թե որպես կուսակցականի: