«Ես գերազանցում եմ բոլորին, ոչ միայն Կիսելյովին». այսօր «Հայաստան. աշխարհաքաղաքական հարաբերություններ» թեմայով կլոր սեղանի ժամանակ այս մասին ասաց Ժողովրդավարության և համագործակցության ինստիտուտի նյույորքյան ներկայացուցչության ղեկավար, ՄԳԻՄՕ-ի պրոֆեսոր Անդրանիկ Միհրանյանը: Ինչպես «Առաջին լրատվականն» արդեն տեղեկացրել էր, Միհրանյանը նախաբանով հանդես գալու հնարավորություն ունեցավ, որից հետո պատասխանեց պատգամավորների և լրագրողների հարցերին:
Մի քանի լրագրողներ միաժամանակ Միհրանյանին խնդրեցին բացատրել, թե ինչո՞ւ են կրեմլյան քարոզիչները, հատկապես Դմիտրի Կիսելյովը, Հայաստանում խոսում սպառնալիքների և ստորացումների լեզվով: Նա բարդույթավորված և թերարժեք անվանեց Կիսելյովի հայտարարություններից վիրավորվածներին: Նաև ասաց, որ զարմացած է, թե ինչ վայրենի և աննորմալ, հակակիսելյովյան արշավ է ծավալվել հայկական մամուլում նրա հայտարարություններից հետո: «Սա ես լրիվ համարում եմ անթույլատրելի, ապուշ և կոմպլեքսավորված մարդկանց վերաբերմունք: Այդ ուժը կարելի էր օգտագործել բարի նպատակների համար»,- ասաց նա:
Դիտարկմանը, թե Դուք գերազանցեցիք Կիսելյովին, նա արձագանքեց, որ ինքը բոլորին է գերազանցում, ոչ միայն Կիսելյովին: «Դուք եթե տեղյակ չեք, ուրեմն սխալ տեղ եք եկել, պետք է իմանայիք, թե ուր եք գալիս և ում հետ եք հանդիպում: Դուք մի քանի մարդկանց վիրավորվածությունն ազգին մի վերագրեք: Դուք ազգի հետ Ձեզ իդենտիֆիկացիա մի արեք: Ես նույնիսկ ինձ այդպես չեմ համարում, չնայած կարող էի ավելի մեծ իրավունքով և՛ հայկական, և՛ ռուսական ազգին վերապահեի»,- ասաց նա: Վերջինս նաև նշեց, որ իրեն կարող են տալ ցանկացած խոսք, և ինքը կխեղաթյուրի այնպես, որ արտասանողը դառնա ազգի դավաճան, ինչպես և վարվել են Կիսելյովի հետ: Այնինչ, նրա համոզմամբ, Կիսելյովի միտքը եղել է հետևյալը. նա ցանկություն է հայտնել, որ Հայաստանում բարձրանա ռուսաց լեզվի իմացության մակարդակը, քանի որ Հայաստանն ինտեգրվում է կառույցների, որտեղ գերիշխում է ռուսաց լեզվի գործածությունը:
