Պրահայի մունիցիպալ դատարանը կալանավորման որոշում է կայացրել հայ «օրենքով գող» Անդրանիկ Սողոյանի (մականունը՝ Զապ) և նրա 4 համախոհների նկատմամբ:
Հիշեցնենք, որ Սողոյանը դատապարտվել էր 22 տարվա ազատազրկման հայ գործարարի սպանության համար ու պետք է վկայություն տար մինչև սեպտեմբերի 1-ը: Սակայն ոչ նա, ոչ էլ իր համախոհները դատարան չէին ներկայացել, ինչի համար էլ ներկայումս գտնվում են միջազգային հետախուզման մեջ:
Հիշեցնենք նաև, որ 2007-ին Սողոյանը պատվիրել էր հայ գործարարի սպանությունը: Պրահայում պատվերի իրականացման ժամանակ սխալմամբ սպանվել էր 1 այլ մարդ ու վիրավորվել կրկին մեկ ուրիշը: Վարձու մարդասպանը՝ ուկրաինացի Թիմուր Տրետյակովը, սխալմամբ դանակով հարվածել էր հային, որի կյանքը հաջողվել էր փրկել բժիշկների շնորհիվ: 2 շաբաթ անց Տրետյակովը նորից սխալվել էր ու սպանել Sazka ընկերության 25-ամյա տնօրենին, որը շրջում էր նույնպիսի Bentley ավտոմեքենայով, ինչպես ենթադրյալ զոհը: Տրետյակովը դատապարտվել էր 22 տարվա ազատազրկման:
Սողոյանի մեղադրական դատավճիռը հրապարակվել էր 2013թ. հոկտեմբերին, որից հետո նա երկար ժամանակով գտնվում էր արտասահմանում, քանի որ դատարանը նրան ժամանակավորապես ազատ էր արձակել:
Բացի այդ, Պրահայի քաղաքային դատարանը նրան երկու անգամ արդարացրել է, սակայն Գերագույն վերաքննիչ դատարանը գործը նորից քննել էր ու կայացրել մեղադրական դատավճիռ: Բացի Սողոյանից՝ սպանության ու թալանի համար դատապարտվել են նրա համախոհները, որոնք ազատազրկման են դատապարտվել 12-18 տարի ժամկետով:
Հիմա Սողոյանը Չեխիայի իրավապահների կողմից գտնվում է միջազգային հետախուզման մեջ` շորթում և սպանություն կատարելու համար: Հայտնի է, նաև մամուլում է մի քանի հրապարակում եղել, որ Զապը Հայաստանում է: Բայց մեր հարցմանն ի պատասխան՝ ՀՀ գլխավոր դատախազությունից տեղեկացրին, որ Սողոյանի նկատմամբ միջազգային հետախուզում է հայտարարված, սակայն չեխական կողմը չի դիմել Հայաստանին՝ Սողոյանին գտնելու և իրենց հանձնելու խնդրանքով:
«Անդրանիկ Սողոյանի նկատմամբ հետախուզումն իրականացվում է «Եվրոպական կալանքի սանկցիայի» (EAW) հիման վրա: Չեխիայի իրավապահ մարմինների կողմից համապատասխան միջնորդություն (հանձնման, դատավճռի ի կատար ածման) ստանալու դեպքում ՀՀ գլխավոր դատախազությունը կձեռնարկի համապատասխան միջոցառումներ: Այս պահին նման միջնորդություն չկա»,-փոխանցեցին դատախազությունից:
Ուշագրավ է, սակայն, որ միջազգային հետախուզման պարագայում Հայաստանը պարտավոր է հայտնաբերել և կալանավորել Զապին, քանի որ միացած է այն միջազգային պայմանագրերին, որով սահմանվում է միջազգային հետախուզման և արտահանձնման կարգը: Հայտնաբերումից ու կալանավորումից հետո նոր միայն չեխական կողմը պետք է դիմի արտահանձնման խնդրանքով:
ՀՀ ոստիկանությունից Զապի հետ կապված տեղեկություններ պարզել մեզ չհաջողվեց: Ոստիկանությունից փոխանցեցին, որ դա դատախազության ֆունկցիան է:
Ինչպես արդեն նշեցինք, հավաստի տեղեկություններով` Զապն այսօր Հայաստանում է, ավելի կոնկրետ՝ Գյումրիում: Նա անարգել շրջում է, և հասկանալի չէ, թե ինչու մեր իրավապահները չեն կատարում միջազգային փաստաթղթերով սահմանված իրենց պարտավորությունները: Հազիվ թե նրանք տեղյակ չեն, թե որտեղ է Զապը, իսկ թե ինչու այդ պարագայում նրան ձերբակալելու քայլեր չեն ձեռնարկում՝ կասկածելի է մնում:
