Սկսած անցած տարվա նոյեմբերից, իսկ վերջին շրջանում հատկապես, Հայաստանում Ամերիկայի հյուպատոսարանը ամենատարբեր պատճառներով մերժում է ՏՏ ոլորտի աշխատակիցներին Ամերիկա մուտքի վիզա տրամադրելու դիմումները: Նախկինում, առանց որևէ խնդրի գործուղումների և այլ նպատակներով ԱՄՆ մեկնած ծրագրավորողները արձանագրում են, որ դեսպանատանը խոչընդոտների են հանդիպում: «Նախկինում նման բան չկար, մենք հանգիստ դիմում էինք դեսպանատուն, վիզա ստանում, և ոչ մի խնդիր չէր առաջանում: Գնում էինք մեր ծրագրերը ներկայացնում, վերապատրաստման դասերի մասնակցում, միջոցառումների մասնակցում և հետ գալիս: Մենք երբեք մտավախություն չենք ունեցել, որ մեզ կմերժեն, իսկ հիմա ես բազմաթիվ մարդկանց գիտեմ, որ մերժել են՝ մեր ֆիրմայի տղաներից շատերին, իմ ընկերներին»,- «Առաջին լրատվական»-ի հետ զրույցում ասաց ծրագրավորող մի երիտասարդ, որը ևս բախվել էր այս խնդրին:
Նշենք, որ Հայաստանում ԱՄՆ հյուպատոսական ծառայության գործունեության կապակցությամբ օրերս իրենց մտահոգությունն էին հայտնել նաև տեղեկատվական, հեռահաղորդակցական և բարձր տեխնոլոգիական ոլորտում գործող ընկերությունները, ինչպես նաև Ինֆորմացիոն տեխնոլոգիաների ձեռնարկությունների միությունը:
ԻՏՁՄ տարածած հաղորդագրության մեջ կարդում ենք. «Հարյուրավոր դեպքեր են գրանցվել, երբ դրական պատասխան ստանալու նպատակով ՏՏ ընկերությունների աշխատակիցները ԱՄՆ հյուպատոսական ծառայությանը ստիպված են դիմել 3 անգամ, որը ոչ միայն նյութական լրացուցիչ ծախս է ենթադրում (յուրաքանչյուր դիմումի արժեքը՝ 160 $), այլև անտեղի վատնվում է տեխնոլոգիական բարձրակարգ մասնագետների թանկարժեք աշխատաժամանակը:
Մեր տեղեկություններով, չնայած հայաստանյան տեխնոլոգիական մասնագետների հաճախակի գործուղումներին, ԱՄՆ միգրացիոն օրենքների խախտումներ չեն գրանցվել»: ԻՏՁՄ գործադիր տնօրեն Կարեն Վարդանյանն «Առաջին լրատվական»-ի հետ զրույցում ավելացրեց, որ եթե ԱՄՆ հյուպատոսության կողմից նման որոշում է կայացվել համատարած մերժել ՏՏ ոլորտի ներկայացուցիչներին մուտքի արտոնագիր տրամադրել, ապա դա միանշանակ սխալ որոշում է, որովհետև այդ որոշումն անմիջականորեն հարվածում է հենց ամերիկյան ընկերություններին: «Վերջին մերժումները հենց ամերիկյան ընկերությունների աշխատակիցներին մերժումներն են»,- ավելացրեց Վարդանյանը:
Նրա խոսքով՝ այս որոշումը հնարավոր է պայմանավորված լինել Եվրասիական տնտեսական միությանը Հայաստանի անդամակցման որոշմամբ: «Մենք պետք է մաքսիմում հետախուզության աշխատակիցներ լինենք, որ հասկանանք, թե ինչով է պայմանավորված այս որոշումը: Մենք պարզապես մեր շահերը պետք է պաշտպանենք և հասնենք նրանք, որ մեր վիզաները չմերժեն: Նրանք մերժում են, մենք դիմադրելու ենք: Տեսնենք՝ ում դիմադրությունը ավելի ուժեղ կլինի»,- նկատեց Կարեն Վարդանյանը: Մինչդեռ նա ավելի վաղ ասել էր, որ ԱՄՆ-ը իր այս գործողություններով հավանաբար որոշել է ինչ-որ ձևով Հայաստանը «պոկել» Ռուսաստանից, և այս ոլորտի ակտիվ երիտասարդներին, մասնագետներին «Դեմ եմ» շարժման օրինակով հանել ԵՏՄ-ի դեմ, որպեսզի նրանք իրենց դժգոհությունը պայմանավորեն ԵՏՄ-ին Հայաստանի անդամակցման որոշումով:
Մեր զրուցակից ծրագրավորողները առայժմ պայքարի ինչ-որ ձևի մասին չեն մտածում, քանի որ համոզված են, որ մեր կառավարությունը, երկրի ղեկավարությունը ԱՄՆ հյուպատոսության հետ համատեղ ընդհանուր լեզու կգտնի, որը կբխի երկու երկրների շահերից էլ: «Մենք համոզված ենք, որ խնդիրը խելամիտ ճանապարհով կլուծվի, քանի որ այս ճանապարհը, մարտավարությունը, որը ընտրվել է, ձեռնտու չէ ոչ մեկին էլ: Մեր գործը մենակ մեզ համար չէ, մենք երկիր ենք ներկայացնում»,- ասացին նրանք:
