ԲՀԿ առաջնորդ Գագիկ Ծառուկյանը, ով հայտարարել է նախագահի ընտրություններում իր մասնակցության ցանկության մասին և առաջիկայում պատրաստվում է «իշխանափոխություն պարտադրել, եթե իշխանությունը շարունակի անտեսել և մերժել համաժողովրդական շարժման արդարացի պահանջները» և փորձի վերարտադրվել սահմանադրական փոփոխությունների միջոցով, պարզվում է, ոչ միայն ՀՀ վարչապետ Հովիկ Աբրահամյանի խնամին է, այլև նրա լուրջ բիզնես-գործընկերը: Այնպես որ, նրանց ոչ միայն խնամիական կապերն են կապում, այլև կապիտալը:
Աբրահամյանն ու Ծառուկյանը մի շարք համատեղ բիզնեսներ ունեն: Hetq.am-ը պարզել է, որ ձկնաբուծական տնտեսությամբ զբաղվող «Էկոֆիշ Թրեյդ» ՍՊԸ-ում 33-ական տոկոս մասնաբաժին ունեն Հովհաննես Աբրահամյանը՝ Հովիկ Աբրահամյանի եղբորորդին, և Հովիկ Թադևոսյանը, իսկ 34 տոկոսը` ԱԺ պատգամավոր Գագիկ Ծառուկյանին է պատկանում: Ձկնաբուծարանը գտնվում է Արարատի մարզի Զորակ գյուղում:
Հովիկ Աբրահամյանի որդին՝ Արգամ Աբրահամյանը, և նրա աներ Գագիկ Ծառուկյանը համատեղ մասնաբաժին ունեն նաև «Ֆրանկ Մյուլլեր» բրենդային ժամացույցների խանութի հիմնադիր «Ֆրանկ Մյուլլեր Երևան Ուազ Դիսթրիբյուշն» ՓԲԸ-ում: Ընկերությունը Հայաստանում գրանցել է «Սիրկապ Արմենիա» ՓԲԸ-ն, սակայն մեկ տարի անց հիմադիրը դուրս է եկել ընկերությունից և բաժնետերեր են դարձել Արգամ Աբրահամյանը՝ 12%, ԱԺ պատգամավոր Գագիկ Ծառուկյանը՝ 13%, մոսկվայաբնակ Արմեն Հայրապետյանը և «Արցախբանկի» ներկայիս բաժնետերեր Հրաչ Կապրիելյանն ու Վարդան Սիրմաքեսը:
Աբրահամյանն ու Ծառուկյանը ևս նույնքան բաժնեմաս ունեն «Այրսիրկապ» ՓԲԸ-ում: «Ֆորցա» ՍՊԸ-ում Արգամ Աբրահամյանը ունի 25% բաժնեմաս, նույնքան բաժնեմաս ունի նաև Գագիկ Ծառուկյանը: Մյուս 50%-ը պատկանում է մոսկվայաբնակ գործարար Գոհար Պապյանի ընտանիքին:
Հովիկ Աբրահամյանի որդին՝ Արգամը, համատեղ բիզնես ունի նաև Գագիկ Ծառուկյանի մյուս փեսայի՝ Աբովյանի քաղաքապետ ԲՀԿ-ական Կարապետ Գուլոյանի հետ: Ըստ hetq.am-ի՝ «Աբովյան Սիթի»-ն Աբովյանում հայտնի է որպես Աբովյանի քաղաքապետ Կարապետ Գուլոյանի սուպերմարկետ, այն գրանցված է նրա մոր անվամբ, իսկ սուպերմարկետի 50 տոկոսը պատկանում է Արգամ Աբրահամյանին:
Ամիրյան 4/7 հասցեում է գտնվում այժմ Արգամ Աբրահամյանին 100%-ով պատկանող «Իմպերիում Պլազա» հյուրանոցը, որի կանոնադրական կապիտալը կազմում է 4,6 մլն ԱՄՆ դոլար, կառուցապատող ու նախկին սեփականատեր Մելիք Գասպարյանի մահից հետո, «Առաջին լրատվական»-ի տեղեկություններով, այն համատեղ սեփականություն էր` Հովիկ Աբրահամյան, Գագիկ Ծառուկյան և Ուկրաինայում Հայաստանի դեսպան Անդրանիկ Մանուկյան: Այնուհետև Մանուկյանը իր մասնաբաժինը վաճառեց նրանց, ապա դուրս եկավ նաև Ծառուկյանը, և հիմա շենքն ամբողջությամբ պատկանում է Աբրահամյաններին:
Թերևս պատահական չէ, որ Կոմիտասի անվան պանթեոնում «Առաջին լրատվական»-ի հարցին` պատրա՞ստ է հրաժարական տալ, եթե Գագիկ Ծառուկյանն առաջիկայում միանա իշխանափոխության պահանջին, Հովիկ Աբրահամյանը պատասխանեց. «Իշխանափոխությունը կարող է լինել միայն հերթական, համապետական ընտրությունների արդյունքում, որը պիտի որոշի մեր ժողովուրդը»: