Հայաստանը կդառնա ԵՏՄ-ի լիիրավ անդամ: Այս մասին այսօր, պատասխանելով «Առաջին լրատվական»-ի հարցին, որ եթե Ռուսաստանն է որոշում ԵՏՄ-ում բոլոր հարցերը, ինչպես ինքն ասել էր անցյալում, ապա կլինի՞ արդյոք մաքսային անցակետ ՀՀ-ի և ԼՂ-ի միջև, ասաց Ժողովրդավարության և համագործակցության ինստիտուտի նյույորքյան ներկայացուցչության ղեկավար, ՄԳԻՄՕ-ի պրոֆեսոր Անդրանիկ Միհրանյանը: Նա նշեց, որ ՌԴ նախագահ Վլադիմիր Պուտինն արեց ամեն ինչ, որպեսզի Հայաստանը միանա եվրասիական ինտեգրացիոն նախագծերին: Միհրանյանի համոզմամբ՝ Հայաստանը կդառնա նախագծերի լիիրավ անդամ:
«Մաքսային հարցերը տեխնիկական հարցեր են, որոնք լուծվում են գործակցության արդյունքում, այնպես որ, ես այստեղ որևէ խոչընդոտ չեմ տեսնում, որևէ լուրջ արգելակող գործոն այդ միության ստեղծման գործընթացում»,- ասաց Միհրանյանը:
Մեկ այլ դիտարկմանը, թե ռուսաստանցի պաշտոնյաները խոսում են Հայաստանի գոյությանը սպառնացող վտանգի մասին, եթե Հայաստանը չմիանար այդ պրոյեկտներին. նման հայտարարությունների պատճառը համարժեք արձագանքի բացակայությո՞ւնն է Երևանի կողմից, Միհրանյանն արձագանքեց՝ ասելով. «Հայաստանում շատ մարդիկ ցնորական վիճակում են գտնվում և իրենք իրենց գլխի մեջ ստեղծում են հայտարարություններ ու պայքարում այդ հայտարարությունների դեմ։ Ես շատ լավ ճանաչում եմ Կիսելյովին։ Եթե որևէ մեկը կարող է տեսնել նրա հայտարարության մեջ որևէ վիրավորական վերաբերմունք, այդ մարդը պետք է գնա բժշկի, որպեսզի կարողանա պարզել, թե ինչն ինչումն է: Գիտեք, եթե որևէ մեկն ասւոմ է, որ լավ կլինի Ռուսաստանի հետ մեծ ներդաշնակության մեջ մտնող հանրապետությունում ռուսաց լեզուն ավելի լավ տարածված լինի, դրանում բարի ցանկություն եմ տեսնում նրա կողմից»: Նրա գնահատմամբ՝ միայն խոցելի մարդը, թույլ մարդը կարող է նման հայտարարություններն օգտագործել հիմար-հիմար ենթադրությունների գալու համար: