ԵՄ-ն Հայաստանի հետ սկսում է «շրջանակավորման վարժություն»: Այս մասին այսօր լրագրողների հետ զրույցում ասաց ՀՀ-ում ԵՄ պատվիրակության ղեկավար Տրայան Հրիսթեան՝ պատասխանելով «Առաջին լրատվական»-ի հարցին՝ ինչպիսի՞ տեսք է ունենալու ՀՀ-ԵՄ հարաբերությունների իրավական նոր հիմքը բանակցությունների արդյունքում, որի համար Հայաստանի և ԵՄ-ի պատվիրակությունների միջև առաջին հանդիպումը կայանալու է Բրյուսելում նոյեմբեր ամսին:
Նա նախ և առաջ հստակեցրեց, որ խոսքը բանակցությունների մասին չէ: «Այն, ինչ մենք նոյեմբերին մեր հայ գործընկերների հետ քննարկելու ենք, կոչվում է շրջանակավորման վարժություն՝ եթե կարելի է այդպես ասել, և մենք կցանկանայինք ուսումնասիրել այն ոլորտները, որոնք համահունչ կլինեն Հայաստանի ստանձնած նոր պարտավորությունների հետ: Եվ հիմա, երբ Հայաստանը ստորագրեց Եվրասիական տնտեսական միությանը միանալու համաձայնագիրը, մենք կցանկանայինք մեր հայ գործընկերների հետ պարզել, թե որոնք են այն ոլորտները, որտեղ մենք կարող ենք խորացնել մեր հարաբերությունները, և սրանք ոլորտային, կրկնում եմ՝ ոլորտային համագործակցության հետ կապված հարցեր են: Այդ ոլորտները ինչպես կարող են համընկնել այն մանդատի հետ, որը մենք իրավական առումով կքննարկենք: Մանդատ, որի վերաբերյալ մենք դեռ ապագայում պետք է բանակցենք: Մենք պետք է շարունակենք իրականացնել այն, ինչի շուրջ համաձայնության ենք եկել Վիլնյուսում»,- ասաց դեսպան Հրիսթեան՝ շարունակելով, որ նոյեմբերի հանդիպումն ընդամենը առաջին նստաշրջանն է լինելու, ապագայում ևս լինելու են հանդիպումներ:
Մեկ այլ հարցի, թե ԵՄ-ին չի՞ անհանգստացնում արդյոք այն, որ քաղաքական դաշտում մրցակցության մեջ են պրոռուսական ուժերը՝ ընդդիմությունը, որը պայքարում է իշխանափոխության համար, ևս պրոռուսական է, պատասխանեց, որ անցած տարի, երբ Հայաստանը որոշում կայացրեց, ԵՄ-ն ասաց, որ հարգում է Հայաստանի քաղաքական ընտրությունը: «Այն փաստը, որ հայկական քաղաքական դաշտում քաղաքական ուժերի միջև համաձայնություն կա, ես գնահատում եմ որպես դրական երևույթ հենց Հայաստանի համար: Իսկ ինչ վերաբերում է ԵՄ-ի հետ համագործակցությանը, ապա ես արդեն նշեցի, որ նույնիսկ այդ ընտրությունից հետո ասացինք, որ մենք շարունակելու ենք մեր համագործակցությունը Հայաստանի և հայաստանյան իշխանությունների հետ՝ խստորեն հավատարիմ մնալով այն ուղղություններին, այն սկզբունքներին, որոնք փոխադարձ կերպով համաձայնեցվել են և առաջ տարվել»,- ասաց դեսպանը:
Մեկ այլ դիտարկման, թե ՀՀ առաջին նախագահ Լևոն Տեր-Պետրոսյանը նշեց, որ ԵՄ-ին միանալով ևս Հայաստանը կկորցներ իր ինքնիշխանության մի մասը, ինչպես ցանկացած միության՝ դրանով իսկ արդարացնելով Հայաստանի ԵՏՄ անդամակցության պայմանները, դեսպանն արձագանքեց՝ ասելով, որ Հայաստանի ԵՄ անդամակցության խնդիր ընդհանրապես այս փուլում գոյություն չունի: