«Առաջին լրատվական»-ի զրուցակիցն է ԱԺ ՀՀԿ խմբակցության ղեկավար Վահրամ Բաղդասարյանը:
– Պարոն Բաղդասարյան, Ձեզ չե՞ն մտահոգում ոչիշխանական ուժերի հանրահավաքները, որոնք գնալով ավելի մարդաշատ են դառնում, և որտեղ իշխանափոխության պահանջն ավելի է լրջանում:
– Եթե մարդիկ դուրս են գալիս և փողոցում ցույցեր են անում, անկախ մարդկանց քանակից, յուրաքանչյուր նորմալ իշխանության դա, իհարկե, պետք է անհանգստացնի: Եվ մենք ենք ասում, թե՝ այո, խնդիր կա: Իսկ ով է ասում, թե մենք չենք ասում, որ պետք է պայքարել մենաշնորհի, կոռուպցիայի դեմ: Մեր առաջարկությունն այն է, որ եկեք միասին գտնենք այն լավագույն տարբերակը, որ կարողանանք միասնաբար պայքարել:
– Այսինքն՝ երկխոսության առաջարկությո՞ւն եք անում ոչիշխանական ուժերին:
– Մենք միշտ պատրաստ ենք եղել ոչ միայն երկխոսության, այլ նաև ցանկացած հարցի շուրջ քննարկման:
– Պատրա՞ստ եք իշխանափոխության հարցի շուրջ քննարկում սկսել:
– Իշխանափոխությունն արդեն ծեծված խնդիր է: Իշխանափոխությունը մենք առաջարկում ենք սահմանադրական փոփոխություններով: Մենք մոդելի փոփոխություն ենք առաջարկում, որն իշխանափոխության ամենադասական ձևն է: Այսինքն՝ իշխանության մի ձևից անցում մյուսին: Իսկ ինչ է նշանակում իշխանափոխություն: Եթե իրենք ժամանակին եղել են իշխանության մեջ, և խնդիրներ կային, միասին քննարկել ենք: Այն ժամանակ դժգոհություններ չեն եղել: Հիմա իշխանության մեջ չեն և ասում են, թե մենք ենք ուզում գալ իշխանության: Ինչի՞ համար եք ուզում գալ, ասում ենք, եթե խնդիրներ կան, եկեք քննարկենք, և դրանց լուծումներ կան:
– «Բարգավաճ Հայաստան» կուսակցության նախագահ Գագիկ Ծառուկյանը հոկտեմբերի 24-ի հանրահավաքում հայտարարեց, որ «սահմանադրական փոփոխությունները հետաձգվեցին ժողովրդի ճնշումների շնորհիվ, որ համաժողովրդական ճնշումը պետք է է՛լ ավելի մեծացվի, ու առանց ժողովրդի համաձայնության ոչինչ մեր երկրում անել թույլ չենք տալու»: Չե՞ք կարծում, որ ոչիշխանական ուժերի պայքարն ու պահանջները բավական լուրջ են:
– Ես զարմանում եմ նման հայտարարությունների վրա: Դա չի հետաձգվել, սահմանադրական փոփոխությունների հայեցակարգը դրված է սեղանին, և քանի որ քաղաքական կոնսոլիդացիայի խնդիր կա, կար քննարկումների անհրաժեշտություն, նախագահը շատ խոհեմաբար վերաբերվեց դրան:
– Բայց ոչ իշխանական ուժերը ընդհանրապես չեն ցանկանում քննարկել սահմանադրական փոփոխությունների հարցը, քանի որ կարծում են, թե իշխանություններն այդպիսով ցանկանում են վերարտադրվել:
– Խոսքն այն մասին է, որ հանրությունը պետք է ավելի լավ ընկալի, իսկ ոչիշխանական ուժերի 90 տոկոսը չի կարդացել հայեցակարգը: Իսկ եթե այն միանգամից ստորագրվում էր նախագահի կողմից, պետք է ասեին՝ վախեցան և արագացնում են:
– Ապրիլի 28-ին, երբ քառյակը մեծ հանրահավաք էր նախապատրասում, հրաժարական ներկայացրեց նախկին վարչապետ Տիգրան Սարգսյանը: Հոկտեմբերյան այս խոշոր հանրահավաքների ժամանակ Սերժ Սարգսյանը հետաձգեց սահմանադրական փոխոխությունների հայեցակարգի մասին իր կարծիքը մինչև 2015 թ. փետրվար-մարտ ամիսները: Այս զուգադիպությունները պատահականությո՞ւն են:
– Տիգրան Սարգսյանի հրաժարականը բացարձակապես կապ չունի իրենց հանրահավաքների հետ: Մեզ մոտ կարող է նորից փոփոխություններ լինեն, նորից հրաժարականներ, իհարկե՝ նման նախադեպեր չկան: Հիմա կառավարությունը, նախագահն ինչ քայլ ձեռնարկեն, պիտի ասեն՝ հանրահավաքի՞ արդյունքում է եղել: Չպե՞տք է աշխատենք: Մենք հիմա բոլորս պիտի նստենք: Մենք սովորական, բնականոն հունով աշխատում ենք:
