«Այս երկրում խնդիրը մեկն է. հստակ իշխանափոխություն: Պայմաններ դնել, պայմաններ առաջարկել. ինչի՞ մասին է խոսքը, ի՞նչ պայման: Այն ուժը, որը դրա արդյունքում իշխանության է եկել, պայմաններ չի իրագործելու»,- այսօր «Առաջին լրատվական»-ի հետ զրույցում ասաց «Հանրապետություն» կուսակցության նախագահ Արամ Սարգսյանը: Վերջինս, անդրադառնալով եռյակի վերջին գործողություններին, հիշեցրեց, որ ԲՀԿ առաջնորդ Գագիկ Ծառուկյանը 2003 թվականին ամբողջ ուժով պաշտպանել է Ռոբերտ Քոչարյանին, ապա 2008-ին կոալիցիա կազմել Սերժ Սարգսյանի հետ: Իսկ նույն կուսակցության անդամ Վարդան Օսկանյանը դիվանագիտական մակարդակներում արդարացրել է Մարտի 1-ի սպանդը: «Ցավալին այն է, որ այդ երեք ուժերը Հայաստանի ապագան տեսնում են ՄՄ-ի շրջանակներում: Այսինքն՝ իրենք ուզում են, որ Հայաստանում ընտրությունները լինեն այնպես, ինչպես, ասենք, Ղազախստանում, ուզում են այնպիսի իշխանություն, ինչպիսին Ռուսաստանում է: Այսինքն՝ իրենք ուզում են, որ ընդդիմություն չլինի: Եվ եթե այստեղի ընդդիմությունն ուզում է, որ Հայաստանն այդ ուղղությամբ զարգանա, ապա Հայաստանում այլևս ընդդիմություն չի լինելու: Իսկ եթե այսօրվա ընդդիմությունը դա է ուզում, ապա ուրեմն իրենք ընդդիմություն չեն»,- նկատեց Սարգսյանը:
«Հանրապետություն» կուսակցության նախագահը, անդրադառնալով վերջին հանրահավաքում Տեր-Պետրոսյանի հնչեցրած մեղադրանքներին մարգինալների մասով, նկատեց, որ Տեր-Պետրոսյանի ասածների ու պահվածքի մեջ էական հակասություններ կան: «Շատ երկար ու շատ դժվարին ճանապարհ ենք անցել, և ճիշտ չեն հիմա այդ որակումներն ու գնահատականները: Բայց մի բան հստակ կարող եմ ասել, որ մենք ընդդիմադիր ենք, մենք ընդդիմադիր ենք Ռուսաստանին, որովհետև դեմ ենք Եվրասիական միությանը: Իսկ եթե մենք փոքրամասնություն ենք, լուսանցքում ենք, իսկ իրենք ժողովուրդ ունեն, ապա թող գործողություններ անեն, մենք դրանից միայն ուրախ կլինենք»,- ասաց Արամ Սարգսյանը: Վերջինիս կարծիքով՝ եռյակում եղած յուրաքանչյուր ուժ իր առանձին պլաններն ունի: «Իմ գնահատականներով՝ այսօր իրականանում են միայն Գագիկ Ծառուկյանի նախանշած պլանները: Նա հստակ դառնում է այդ կոնտենտի լիդերը, իր խոսքից է կախված ամեն ինչ, և բոլորը նրա խոսքին են սպասում: Նա ընդդիմադիր չլինելով դարձել է հստակ ընդդիմության լիդեր, ապահովեց զանգված, որը նրան ընդունում է որպես Հայաստանի հաջորդ նախագահի թեկնածու: Նա ապացուցեց, որ մարդ բերողը ինքն է, ու մարդիկ գալիս են իրեն լսելու, ոչ թե մնացածին, որը տխուր է Տեր-Պետրոսյանի և Դեմիրճյանի համար: Ծառուկյանին միայն խորհուրդ կտայի իր մասին երրորդ դեմքով քիչ խոսի: Սիրուն չի»,- ասաց Սարգսյանը՝ հավելելով, որ Ծառուկյանը չի զարմացնի իշխանությունների հասցեին հնչող ելույթներով: «Դրանով ինձ չես զարմացնի, ես Արտաշես Գեղամյան եմ տեսել»:
Սարգսյանի գնահատմամբ, Տեր-Պետրոսյանը ազարտի մեջ է, այն էլ՝ երիտասարդական ազարտի և ցանկանում է ամեն գնով հաղթած դուրս գալ: «Ես իրեն հաջողություն եմ մաղթում: Ես չեմ նեղսրտում, որ մեր ձեռքով չի իշխանափոխություն լինում: Ես նեղսրտում եմ, որ իշխանափոխություն չեղավ, որի մեղավորը նաև ես էի: Ես նեղսրտում եմ, որ իշխանափոխություն չեղավ 2008-ին, 2013-ին՝ Րաֆֆի Հովհաննիսյանի ժամանակ: Ես նեղսրտում եմ, որ հիմա էլ չի լինելու այդ իշխանափոխությունը: Փորձս է հուշում, իսկ պատճառն այն է, որ բոլոր 3 դեպքերում էլ քաղաքական ուժերը փորձել են հաղթանակը բերել Մոսկվայից: Բայց Մոսկվան հաղթանակը միշտ տալիս է գործող իշխանությանը»,- ասաց Սարգսյանը:
Նա չբացառեց եռյակի միջոցով Քոչարյանի՝ քաղաքականություն վերադարձի տարբերակը: «ՀԱԿ-ը չի գնա դրան, բայց ԲՀԿ-ն, որն այսօր ինքն է վճարում, ինքն է խմում շամպայնը, կարող է բերել Քոչարյանին: Չեմ բացառում»։
Առավել մանրամասն՝ տեսանյութում։