«Հոկտեմբերի 27-ը այն գործն էր, որի բացահայտումը պետք է ցույց տար, թե ովքեր են Հայաստանի՝ որպես պետության, թշնամիները, որ հետագայում նման բաներ չլինեին: Ակնհայտ էր, որ Հոկտեմբերի 27-ը ոճրագործություն էր երկրի պետականության, մեր ժողովրդի դեմ, երկիր, որն առաջատար էր դարձել մեր տարածաշրջանում»,- այսօր Եռաբլուրում «Առաջին լրատվական»-ի հետ զրույցում անդրադառնալով Հոկտեմբերի 27-ի գործի բացահայտմանը՝ ասաց «Հանրապետություն» կուսակցության նախագահ, Վազգեն Սարգսյանի եղբայր Արամ Սարգսյանը:
«Հայ hասարակության մոտ բազմաթիվ հարցեր կան՝ սկսած զենքերը ԱԺ տանելուց, վերջացրած բազմաթիվ այլ հարցերով: Կան նաև աշխարհաքաղաքական խնդիրներ, որոնց պատասխանները տրված չեն: Գործող իշխանության շրջանակներում, ներառյալ ներկայիս ԱԺ նախագահը, հայտարարել են, որ այստեղ արտաքին միջամտություն է եղել: Համաձայն լինելով այդ տեսակետի հետ՝ չեմ կարող բացառել, որ արտաքինը չէր կարող ոչ մի բան անել, եթե ներքին համապատասխան ծառայությունները իրենց գործն անեին: Գործի դատաքննությունը հուշում էր, որ այն ժամանակվա գործող նախագահ Ռոբերտ Քոչարյանը շահագրգռված էր գործի չբացահայտմամբ»,- հավելեց Սարգսյանը:
«Էս ամեն ինչին նայելով՝ նաև պետության զարգացումը ետ գցելու աշխարհաքաղաքական ենթատեքստեր եմ տեսնում, ինչպես նաև մասնավոր մարդկանց վախը՝ դատաքննությունը ետ գցելու: Առկա է նաև գործող իշխանության ներքին վախը»,- ասաց Արամ Սարգսյնաը:
Նրա խոսքով՝ հակառակ դեպքում անհասկանալի է, թե ինչպես է, որ երկրի նախագահը գնում է ոճրագործի հետ բանակցությունների, 2 ժամ առաջ սենյակ են պատրաստում, և այդ սենյակը չի գաղտնալսվում: Իսկ եթե գաղտնալսվել է, ապա հասկանալի չէ, թե ուր են այդ ձայնագրությունները:
Արամ Սարգսյանի խոսքով՝ այս իշխանությունների օրոք գործը չի բացահայտվի: «Ես կարծում եմ, որ Հայաստանը ապագա չի ունենա այնքան ժամանակ, քանի դեռ Հոկտեմբերի 27-ը, Մարտի 1-ը բացահայտված չեն, քանի որ Հոկտեմբերի 27-ին կրակեցին հայոց պետականության դեմ, իսկ Մարտի 1-ին՝ հայ ժողովրդի: Այդ առումով այս գործերը նույնն են, որոնց բացահայտումն այս իշխանությունների օրոք անհնարին է: Միանշանակ իշխանափոխությունը և ժողովրդի քվեն ստացած իշխանությունները միայն նախանձախնդիր կլինեն այս գործի ամբողջական բացահայտման հարցում»,- հավելեց Սարգսյանը:
Առավել մանրամասն՝ տեսանյութում: