Կոմիտասի անվան պանթեոնում այսօր «Ժառանգություն» կուսակցության առաջնորդ Րաֆֆի Հովհաննիսյանը «Առաջին լրատվական»-ի հետ զրույցում ի պատասխան Հոկտեմբերի 27-ի բացահայտված լինելու առթիվ իշխանության ներկայացուցիչների հայտարարություններին՝ ասաց. «Մեր ժողովրդի գերակշռող մեծամասնությունը գիտի, որ Հոկտեմբերի 27-ը մինչև վերջ բացահայտված չէ, և այդ չբացահայտվածությունը կապ ունի հենց այս իշխանակարգի հետ: Դրա համար անհրաժեշտ է, որ մեր ժողովուրդը միասին կանգնի և ունենա վերջապես այն իշխանությունը, որը հաշվետու է իրեն, որը պաշտպանում է իրեն, և որը ըստ արժանվույն Մարտի մեկի, Հոկտեմբերի 27-ի և մնացած ոճիրների ծալքերը կբացի: Ներկա դրությամբ դա անհնար է, և, իհարկե, պիտի թաքցնեն»:
Մեր հարցին, թե Եռյակի ներսում առկա տարաձայնություններով հնարավո՞ր է իշխանափոխություն իրականացնել, Րաֆֆի Հովհաննիսյանն ասաց. «Եթե մենք լուրջ մոտենանք Հոկտեմբերի 27-ի այս աննախադեպ հարվածին մեր պետության դեմ, ելքերը կգտնենք: Այդ ելքերը ենթադրում են միասնականություն, արժանապատվություն և ժողովրդի առջև հաշվետվողականություն. հույս ունենք, որ կհասնենք դրան»:
Մանրամասները դիտեք տեսանյութում: