Լոռու մարզի ընդհանուր իրավասության դատարանում հաշտության հիմքով կարճվել է ընտանեկան բռնության վերաբերյալ հարուցված հերթական քրեական գործի վարույթը:
38-ամյա Արմեն Թ.-ն նախկինում 9 անգամ դատապարտվել է: Վերջին անգամ 2012 թվականին է դատապարտվել կնոջը միջին ծանրության վնաս պատճառելու և սուտ մատնություն կատարելու համար:
2013 թվականի հոկտեմբերի 31-ին նա պայմանական վաղաժամկետ ազատվել է պատժի կրումից: Իսկ 2014 թվականի փետրվարի 19-ին և 24-ին հարուցվել են քրեական գործեր կնոջ նկատմամբ վերստին բռնություններ գործադրելու համար: Հարուցված գործերը միացվել են մեկ վարույթում:
Ըստ մեղադրանքի՝ կալանավայրից ազատվելուց հետո Արմեն Թ.-ն պարբերաբար ծեծի է ենթարկել իր հետ փաստական ամուսնական կապերի մեջ գտնվող կնոջը, դիտավորյալ կերպով ֆիզիկական ցավ ու հոգեկան տառապանքներ է պատճառել նրան:
2014 թվականի փետրվարի 9-ին, գիշերվա ժամը 3-ին Արմենը, առաջադրված մեղադրանքի համաձայն, իրենց տնակում վիճաբանել է կնոջ հետ ու անչափահաս որդու ներկայությամբ ձեռքերով ու փայտով մի քանի անգամ հարվածել է կնոջ գլխին, պատճառել մարմնական վնասվածքներ:
Փետրվարի 20-ի ուշ երեկոյան Արմենը գնացել է այն բնակարան, որտեղ ժամանակավորապես հանգրվանել էր նրա կինը՝ վեճերից ու ծեծից խուսափելու համար:
Այդ բնակարանում Արմենը կրկին վիճաբանել է կնոջ հետ, ձեռքերով ու փայտով նորից հարվածել նրա գլխին ու նրա առողջությանը թեթև վնաս պատճառել՝ առողջության կարճատև քայքայումով:
Մարտի 30-ին Արմենն իրենց տնակում ծեծի է ենթարկել կնոջը, պատճառել ֆիզիկական ցավ:
Առաջադրված մեղադրանքում Արմենն իրեն մեղավոր չի ճանաչել:
Տուժողը նախաքննության ժամանակ հայտնել է, որ կալանավայրից ազատվելուց հետո Արմենը իրենց հետ համատեղ բնակվել է տնակում: Նա չարաշահել է խմիչքը, անհիմն վիճաբանել իր հետ, ծեծի ենթարկել:
Շատ ժամանակ ինքը ոստիկանություն չի դիմել, բայց գնալով բռնություններն անտանելի են դարձել: Ստիպված դիմել է ոստիկանություն:
Արմենի ծեծից խուսափելու համար ինքը նույնիսկ մեծ որդու հետ հեռացել ու բնակություն է հաստատել ընկերուհու բնակարանում:
Փետրվարի 20-ին Արմենը եկել է ընկերուհու բնակարան, պահանջել, որ ինքը գնա նրա հետ: Հետո բորբոքվել է, իրեն ձեռքերով ու փայտով հարվածներ է հասցրել: Ինքը մի կերպ կարողացել է փախչել ու գնալ հիվանդանոց:
Ինքը երեք դեպքի առնչությամբ է դիմել ոստիկանություն, բայց շատ դեպքերում էլ Արմենի հաշվեհարդարից վախենալով՝ իր նկատմամբ գործադրված բռնությունների մասին չի հայտնել:
Տուժող կինն ասել է, թե ցանկանում է, որ Արմենը ենթարկվի քրեական պատասխանատվության:
Ընդհանուր իրավասության դատարանում տուժող կինը պնդել է նախաքննական ցուցմունքները, հայտնել, թե Արմենն անտանելի է, երբ խմիչք օգտագործած է լինում: Սթափ վիճակում նա իրեն համեմատաբար նորմալ է դրսևորում:
Կինն ասել է, թե նախկինում մի անգամ Արմենը «արմատուրով» իր ձեռքը ջարդել էր, ինչի համար դատապարտվել է 5 տարի ազատազրկման: Այդ պատժից պայմանական-վաղաժամկետ ազատվել, տուն է եկել 2013 թվականի հոկտեմբերի վերջին և մինչև 2014 թվականի փետրվարը իրեն դրսևորել է նորմալ:
Դրանից հետո նորից սկսել է խմել, չնչին առիթներով իրեն ծեծել:
Ինքն ու Արմենը փաստացի ամուսիններ են, ունեցել են 8 երեխա, որոնցից 3-ը մահացել են: Արմենն անգամ երեխաների հայրությունը չի ճանաչել, բայց միշտ իրեն կշտամբում է, թե երեխաներին լավ չի պահում:
Արմենի վարքագծի պատճառով երեխաները ցաքուցրիվ են եղել: Երեխաներից երկուսը սկեսուրի մոտ են:
Արմենը պատահել է՝ ձմռանը իրեն դուրս է արել տնից, ինքը մնացել է փողոցում: Մի անգամ դանակը կոկորդին է դրել, սպառնացել, թե կսպանի: Մի անգամ կացնով է հարձակվել, իրենց տանտերն է իրեն փրկել՝ նրան տեսնելով Արմենը կացինը պահել է: Բայց այդ դեպքերի կապակցությամբ ինքը ոստիկանություն չի դիմել…
Իր միակ խնդրանքն ու պահանջն այն է, որ Արմենն իրեն հանգիստ թողնի, որպեսզի ինքը կարողանա աշխատել, իր երեխաներին պահել:
Արմենի չափահաս որդին հայտնել է, թե հոր բացասական վարքագծի ու հաճախակի վիճաբանությունների պատճառով ինքը հեռացել է տնից ու բնակություն հաստատել մոր ընկերուհու տանը:
Փետրվարի 19-ին հայրը զանգել է իրեն ու անհիմն վիճել իր հետ: Նույն օրը ժամը 23-ին մայրը եկել է իր մոտ, ասել, որ հայրը ծեծել է նորից: Իրենք դուրս են եկել մոր ընկերուհու բնակարանից, շրջել են քաղաքում:
Գիշերվա ժամը 2-ին վերադարձել են: Քիչ անց հայրը պատուհանով գաղտնի ներս է մտել ու ասել. «Էս մորդ ծոցից դուրս եկա՞ր», ու բռունցքով խփել է իր դեմքին: Ինքը փախել է տնից, դիմել է ոստիկանություն:
Փետրվարի 20-ին նորից հայրը եկել ու պահանջել է, որ մայրը գնա իրենց տնակը: Մայրը չի համաձայնել: Նրանք նորից վիճաբանել են, իսկ ինքը վախենալով,, որ հայրն իր ներկայությունից ավելի կզայրանա, նրանց թողել է ու դուրս է եկել:
Գնացել է ոստիկանություն, խնդրել է, որ միջոցներ ձեռնարկեն, որպեսզի հայրն իրենց չանհանգստացնի:
Այդ օրը մոր ընկերուհու բնակարանը անհայտ պայմաններում այրվել է: Ինքը կասկածում է, որ հայրն է արել, բայց դա չի ապացուցվել: Ինքը պատրաստվում է հեռանալ քաղաքից:
Ընդհանուր իրավասության դատարանում Արմենի որդին պնդել է նախաքննական ցուցմունքները: Ասել է, թե դեպքի օրը հայրը պատուհանով բնակարան է մտել, լկտի խոսքեր ասել իրեն, ինքն էլ վառարանի վրայի սուրճը լցրել է հոր վրա:
Հոր հասցրած հարվածից հետո ինքը ոստիկանություն է դիմել, դատաբժիշկը եզրակացրել է, որ իր ստացած վնասվածքը վտանգավոր չէ, սակայն այդ հարվածից հետո ինքը հաճախ գլխացավեր է ունենում, անգամ հոնքի վրա սպի է մնացել…
Հայրը շատ վատ վարքագիծ ունի, պարբերաբար իրեն վարկաբեկել է: Հորը վիճելու առիթ պետք չէ, ամեն չնչին բանից կարող է վեճ ստեղծել: Սթափ վիճակում նա նորմալ մարդ է, իսկ խմած վիճակում լրիվ այլ մարդ է դառնում:
Արմենի անչափահաս որդին հայտնել է, թե հայրն իր ներկայությամբ շատ անգամ է մորը ծեծի ենթարկել:
Այս բոլոր ցուցմունքներից հետո, մինչև ամբաստանյալի ցուցմունք տալը տուժող կինը հայտնել է, թե… հաշտվել է ամուսնու հետ, նրան ներել է՝ հաշվի առնելով, որ նա հիվանդ է և գրավոր պարտավորվել է իրենից ու երեխաներից հեռու մնալ:
Ամբաստանյալ Արմենը դատարանում խոստացել է, որ կնոջն ու զավակներին չի անհանգստացնի: Չի՜ առարկել, որ քրեական գործի վարույթը կարճվի տուժողի հետ հաշտվելու հիմքով:
Մեղադրողը նույնպես չի առարկել, որ քրեական գործի վարույթը կարճվի:
Ընդհանուր իրավասության դատարանը քրեական գործի վարույթը ՀՀ քրեական օրենսգրքի 119 հոդվածի 1-ին մասով կարճել է, Արմեն Թ.-ի նկատմամբ քրեական հետապնդումը դադարեցրել է տուժող կնոջ հետ հաշտվելու հիմքով:
Արմենի խափանման միջոց կալանավորումը վերացվել է, նա ազատ է արձակվել դատարանի դահլիճում:
Բայց ընտանեկան բռնարարը, հատկապես հարբեցող բռնարարը, այդքան հեշտությամբ և խոստում տալով իր բնույթը կփոխի՞ արդյոք: Ժամանակը ցույց կտա, թե դատարանական հաշտությունը ինչի կհանգեցնի այս մարդկանց…
