Էրեբունի և Նուբարաշեն վարչական շրջանների ընդհանուր իրավասության դատարանում Վլադիմիր Գրիգորյանի նախագահությամբ ավարտվել է Արմենակ Գրիգորյանի գործի դատական քննությունը:
21-ամյա Արմենակը մեղավոր է ճանաչվել շորթում կատարելու համար՝ ՀՀ քրեական օրենսգրքի 182 հոդվածի 1-ին մասով:
Ըստ դատական ակտի՝ 2014 թվականի ապրիլ ամսվա ընթացքում Արմենակը պարբերաբար զանգահարել է իր ծանոթուհի Սոնյային (անունը փոխված է), նրա մասին արատավորող տվյալներ, այն է՝ իրենց համբույրի տեսագրությունը հրապարակելու սպառնալիքով պահանջել և Տիգրան Մեծի 1-ին նրբանցքում պարբերաբար գումարներ է ստացել Սոնյայից:
Ապրիլի 4-ին Արմենակը ստացել է 40 հազար դրամ, ապրիլի 8-ին՝ 120 հազար դրամ, ապրիլի 14-ից մինչև 21-ը երեք հանդիպումով ստացել է համապատասխանաբար՝ 50 հազար դրամ, 50 հազար դրամ և 40 հազար դրամ, իսկ ապրիլի վերջին էլ ներկայացրել է 50 հազար դրամի պահանջ:
Սոնյան հասկացել է, որ Արմենակի պահանջները այդպես կարող է անվերջ շարունակվեն, և դիմել է ոստիկանություն:
Գործի նախաքննության ընթացքում Սոնյայից վերցված գումարներն ամբողջությամբ վերադարձվել են Արմենակի կողմից:
Ընդհանուր իրավասության դատարանում Արմենակն իրեն լիովին մեղավոր է ճանաչել, զղջացել կատարածի համար, նրա միջնորդությամբ գործը քննվել է արագացված կարգով:
Տուժողը քաղհայցի պահանջ չի ներկայացրել:
Արմենակ Գրիգորյանը մեղավոր է ճանաչվել մեղսագրված արարքի համար և դատապարտվել է 400 հազար դրամ տուգանքի: