«Առաջին լրատվական»-ի տեղեկություններով՝ այսօր Գորիսի քաղաքապետ Վաչագան Ադունցը հավաքել է քաղաքի մանկապարտեզների վարիչներին և տեղեկացրել, որ այսուհետ Գորիսի մանկապարտեզները կրկին կլինեն վճարովի:
Գորիս քաղաքում ՆՈՒՀ է հաճախում մոտ 1000 երեխա, իսկ համայնքի նախադպրոցական ուսումնական հաստատություններ հաճախող երեխաների ծնողներից գանձվող ամսական վարձավճարի չափը 4000 դրամ է:
Տեղեկությունը տարակուսանք է առաջացրել գորիսեցիների շրջանում, քանի որ անձամբ Սուրիկ Խաչատրյանն է գորիսեցիներին խոստացել, որ մայիսի 1-ից նախակրթական ուսումնական 7 հաստատություններ հաճախող երեխաների վարձավճարները փոխանցելու է իր «Սյունիք-Զանգեզուր» բարեգործական հիմնադրամը: Գորիսի նախկին ղեկավար Նելսոն Ոսկանյանը մամուլում ասել էր, որ ֆինանսավորումը սկսելու մասին գրավոր տեղեկացրել է հիմնադրամը, և որ այդ բարեգործությունը կտևի մինչև տարեվերջ: Ուշագրավն այն է, որ Սուրիկ Խաչատրյանի հիմնադրամի բարեգործությունը Գորիսի մանկապարտեզներին համընկել է Գորիսի քաղաքապետի ընտրական շրջանի հետ:
«Առաջին լրատվական»-ի հետ զրույցում Գորիսի նոր քաղաքապետ Վաչագան Ադունցը չհերքեց, որ նման հրահանգ տվել է մանկապարտեզների վարիչներին: Մեր հարցին, թե ինչո՞ւ է դադարեցվել հիմնադրամի ֆինանսավորումը, և արդյոք դա չի՞ նշանակում, որ բարեգործությունը եղել է հենց իր ընտրության նպատակով, ասաց. «Ոչ: Այդ հարցը կարող եք հիմնադրամի ղեկավարությանը տալ: Չկար պայմանագիր՝ ժամանակի առումով, հիմնադրամը դիմել էր ֆինանսավորման համար, հիմա էլ չգիտեմ ինչ պատճառներով՝ այդ ֆինանսավորումը դադարեցնում է»:
Գորիսի քաղաքապետը չի պարզել, թե ինչու է հիմնադրամը դադարեցնում ֆինանսավորումը: Մեր դիտարկմանը, թե նախկին քաղաքապետն ասել էր՝ մինչև տարեվերջ պետք է ֆինանսավորի հիմնադրամը, Ադունցն ասաց, որ ինքը նման տեղեկատվության չի տիրապետում:
Քաղաքապետի խոսքերով՝ ծնողներն իրենք չեն ցանկանում, որ հիմնադրամն այլևս վճարի իրենց երեխաների վարձը, քանի որ «իրենք ապահովված են և կարող են վճարել իրենց երեխայի վարձը»: «Ընդամենը կարելի է անապահովների վարձը վճարել, ոչ բոլորի»:
Նկատեցինք, որ փաստորեն Գորիսում ծնողներն ավելի ապահովված են, քան Երևանում, որտեղ մանկապարտեզներն անվճար են: «Ես չգիտեմ, միգուցե Երևանի քաղաքապետարանը ավելի մեծ հնարավորություններ ունի, Գորիսում այդ հնարավորությունները չկան: Իսկ բարեգործի փոխարեն ես չեմ կարող պատասխանել»,- ի պատասխան ասաց Գորիսի քաղաքապետը: