Հագուստի երիտասարդ դիզայներ Յուլե Վայբելը ստեղծում է թղթե քանդակներ: Հատուկ տեխնիկան, որին տիրապետում է Յուլեն, սովորական նյութը վերածում է տպավորիչ եռաչափ օբյեկտների, որոնք կարողանում են սեղմվել և հեշտությամբ փոխել իրենց ձևը՝ գրում է kulturologia.ru-ն:
«Կյանքը ճանապարհորդություն է, իսկ ծալվող օբյեկտները արտահայտում են մեր աշխարհի փոփոխականությունը,- բացատրում է Յուլեն:- Ես ծալվելու հատկությունը ակտիվորեն օգտագործում եմ իմ ստեղծագործության ընթացքում: Արդյունքում ստացվում են զարմանալի իրեր՝ զգեստներ, որոնք մարմնի շարժումներից փոխում են ձևը, ծալվող հովանոցներ… Այս բոլոր իրերը էլեգանտ են և գեղեցիկ, և դրանից բացի՝ դրանք առօրյա կյանքին ավելացնում են շարժում»,- պատմում է դիզայները:
Յուլեն իր աշխատանքների համար ընտրել է դիմացկուն սինթետիկ թուղթը: Այն հաճախ օգտագործում են հատուկ հագուստի և դիմացկուն տպագրության արտադրության մեջ: Սակայն թուղթը միակ նյութը չէ, որով աշխատում է դիզայները: Դիզայներն աշխատում է նաև թեթև շիֆոնով:
Նա հեշտությամբ խաղում է շրջակա միջավայրի օբյեկտների, նորաձև տենդենցների, երկրաչափական պատկերների հետ: Նրա աշխատանքները անհավանական գեղեցիկ են և յուրահատուկ: Ուստի պատահական չէ, որ նրա գործերի ցուցահանդեսներից հետո այցելուները դեռ երկար ժամանակ գտնվում են տեսածի տպավորության ներքո:
Ներկա պահին դիզայները բնակվում և աշխատում է Լոնդոնում: