Գերմանիան դեկտեմբերի 1-ին Եվրամիության բյուջեից գումարի վերադարձ կստանա 779 միլիոն եվրոյի չափով՝ հաղորդում է The Local-ը՝ հղում անելով Եվրահանձնաժողովի փաստաթղթերին։
Գերմանիայի վճարի փոքրացման պատճառը սպասվածից ավելի թույլ տնտեսական աճն է 1995 թվականից հետո ընկած ժամանակահատվածում։ Երկրի միավորումից հետո նրա հարուստ արևմտյան շրջանները ստիպված էին սուբսիդավորել նախկին Արևելյան Գերմանիային՝ պարզաբանում է պարբերականը։
Մինչդեռ Մեծ Բրիտանիային պարտավորեցրել են 2,1 միլիարդ եվրոյի հավելավճար կատարել Բրյուսելին։ Դա առաջացրել է վարչապետ Դևիդ Քեմերոնի վրդովմունքը, որը պահանջել է անհապաղ հանդիպում կազմակերպել եվրոպական ֆինանսների նախարարների հետ։ Քեմերոնը հայտարարել է, թե «խոշորագույն դոնորներից մեկին այդպիսի հաշիվ ներկայացնելն» անընդունելի է, և ընդգծել է, որ Եվրահանձնաժողովի պահանջը «չի նպաստում Մեծ Բրիտանիայի պահպանմանը ԵՄ կազմում»։
ԵՄ երկրների ֆինանսների նախարարները համաձայնել են արտահերթ նիստ անցկացնել՝ վերանայելու համար բրիտանական վճարումն ընդհանուր գանձարան։ Սակայն Եվրահանձնաժողովի ղեկավար Ժոզե Մանուել Բարոզուն արդեն հայտարարել է, թե Մեծ Բրիտանիայի նկատմամբ 2,1 մլրդ եվրոյի հավելավճարի պահանջը համապատասխանում է ԵՄ պահանջներին, որոնց հավանություն են տվել հենց անդամ պետությունները։
Ֆրանսիայի նախագահ Ֆրանսուա Օլանդը նշել է, որ բյուջետային պայմանավորվածությունները պետք է կատարվեն ԵՄ բոլոր երկրների կողմից։ Նա նաև լռության չի մատնել այն փաստը, որ Ֆրանսիայի վճարումը, նոր կանոններով, նվազում է միլիարդ դոլարով։