Առաջիկայում Ուկրաինայում կայանալիք խորհրդարանական ընտրություններին մասնակցում են ազգությամբ հայ թեկնածուներ ևս: Ժիտոմիրի ընտրատարածքում, ի թիվս այլ թեկնածուների, առաջադրվել է նաև Սուրեն Գևորգյանը, որը դժվարանում է գնահատել իր հնարավորությունները գալիք ընտրություններում, թեև լիահույս է: «Առաջին լրատվական»-ի հետ զրույցում հայ թեկնածուն նշեց, որ մշտապես կապ է պահպանում հայ համայնքի հետ, թեև երբ փորձել է նախընտրական շրջանում պատրաստակամություն հայտնել հայ համայնքի հետ ավելի ակտիվ շփվելու վերաբերյալ, արձագանքներ չի ստացել:
Անդրադառնալով Ուկրաինայի արտաքին քաղաքական ընտրությանը՝ նա ասաց, որ Ուկրաինան կողմնորոշվել է իր ընտրության հարցում, որը քաղաքակիրթ և հեռանկարային է և ունի Ուկրաինայի բնակչության մեծամասնության աջակցությունը:
«Ցավոք, քաղաքացիների մի փոքր մասը դեմ է այդ ընտրությանն ու կողմնակից Ռուսաստանին, չեմ էլ կարող ասել այդքան Ռուսաստան, քանի որ նրանք քարոզում են անկախ Դոնբասի սկզբունքները, որոնք ինձ համար անհասկանալի են: Բայց նրանք զինված ապստամբություն են բարձրացրել, և հիմա մեզ մոտ արևելքում պատերազմ է ընթանում: Բայց դա չխանգարեց Ուկրաինայի ընտրությանը: Ցավոք, եղավ Ղրիմի բռնակցումն ու Դոնբասի մի հատվածի շրջափակումը, բայց Ուկրաինայի ժողովրդի ընդհանուր ընտրության վրա դա չազդեց»,- ասաց Սուրեն Գևորգյանը՝ հավելելով, որ Դոնբասում ծավալված հակամարտությունը նախադեպը չունեցող մի երևույթ է և միջազգային քաղաքականությունում, և միջազգային իրավունքում: Նրա որակմամբ, սա արհեստականորեն ստեղծված քաղաքական ճգնաժամ է, որը հանգեցրել է արյունահեղ զինված հակամարտության, այդ պատճառով այսօր մեխանիզմ նույնիսկ չկա, որ Դոնեցկի ու Լուգանսկի շրջաններն անկախ պետականություններ դառնան:
«Ես այսօր Դոնբասում հակամարտության լուծում չեմ տեսնում: Խաղաղ կարգավորումը ոչ մի արդյունք չի բերում, որովհետև Դոնեցկը վերածվել է թեժ գոտու, որտեղ մեծ թվով չվերահսկվող ավազակախմբեր են, որոնք չեն ղեկավարվում ոչ ոքի կողմից: Ինձ համար դա քրեական տարածաշրջան է, որն այսօր ավելի շատ խնդիրներ է բերելու Ռուսաստանին, քան Ուկրաինային, որովհետև այդ ողջ քրեականությունը կարող է վաղ թե ուշ վերադառնալ Ռուսաստան: Ես խնդրի լուծումը չեմ տեսնում այսօրվա պայմաններում: Քանի դեռ չի դադարեցվել կրակը, մարդիկ բանակցությունների սեղանի շուրջ չեն նստել և չեն սկսել միջոցներ ձեռնարկել այն քրեականության դեմ, որը զենք է վերցրել ձեռքը»,- ասաց Սուրեն Գևորգյանը:
Անդրադառնալով իր ծրագրերին՝ նա ասաց, որ Ժիտոմիրի համար ցանկանում է գրավել առավելագույն օտարերկրա ներդրումներ, քանի որ տվյալ շրջանը հեռանկարային է թեթև արդյունաբերության տեսանկյունից՝ հագուստի, կտորի, արտադրություն և սննդի արդյունաբերություն, որովհետև բոլոր բազային մթերքներն արտադրվում են: «Այդ պատճառով մեզ հարկավոր է ընդամենը ավելացնել արժեքը, աշխատատեղեր ստեղծել և մասնակցել ուկրաինական քաղաքացիական հասարակության, ուկրաինական ազգային գաղափարախոսության ստեղծմանը: Թող այն ուկրաինալեզու, ռուսալեզու լինի, բայց գլխավորն այն է, որ բոլոր մարդիկ կենտրոնան այն պետության շուրջ, որը պետք է ուժեղ լինի: Ես կցանկայի Ուկրաինան հավասարազոր տեսնել Եվրոպային, այլ ոչ թե այնպես, որը մենք ոչ ոքի պետք չենք: Եթե անկեղծ ասենք, ապա Եվրոպան մեզ ընդունել է, բայց երբ մենք եկանք Եվրոպա, դարձանք անպետք: Ստիպված ենք ինքնուրույն պայքարել»,- ասաց Սուրեն Գևորգյանը:
Խոսելով իր ընտրատարածքում ընտրապայքարից՝ նա ասաց, որ առաջադրվել է 22 թեկնածու, չկա ակնհայտ առաջատար, բայց կան կուսակցությունների ներկայացուցիչներ, որոնք իրենց նույնացնում են կուսակցությունների հետ:
«Եթե նախկինում կար երկու կուսակցություն՝ իշխանության և ընդդիմության կուսակցությունները, ապա հիմա առաջադրվում են իշխանական կուսակցության 3-4 թեկնածուներ, 3-4 ընդդիմության թեկնածուներ: Լղոզվել է իշխանություն և ընդդիմություն հասկացությունների սահմանները: Դա է միակ տարբերությունը նախորդ ընտրությունների հետ համեմատ, խառնվել է: Եթե նախկինում սպիտակ և կարմիր էր, ապա հիմա սպիտակի մի քանի երանգներ են մինչև սևը: Մարդկանց մոտ բացակայում է գաղափարախոսությունը: Եթե նախկինում ինչ-որ որոշակի ձև ուներ, ապա հիմա ընդհանրապես բացակայում է գաղափարախոսությունը: Մարդիկ գնում են, ինչ-որ բաներ են խոստանում, տառապում են պոպուլիզմով կամ էլ ռադիկալիզմով»,- ասաց հայ թեկնածուն: