Իսպանիայի վարչապետ Մարիանո Ռախոյը կրկին արտահայտվել է Կատալոնիայի անկախության մասին հարցում անցկացնելու դեմ, որը, նրա խոսքով, հակասում է երկրի օրենսդրությանը: Այս մասին հայտնում է Ria Novosti-ն:
Ավելի վաղ Կատալոնիայի ղեկավար Արթուր Մասը հայտարարել էր, որ նոյեմբերի 9-ի քվեարկությունը կանցկացվի ոչ թե հանրաքվեի, այլ հարցման՝ բնակչության հետ յուրատեսակ խորհրդակցության ձևով: Հարցերը կմնան նախկինը. «Արդյոք ուզո՞ւմ եք, որ Կատալոնիան պետություն դառնա», և «Եթե այո՝ արդյոք ուզո՞ւմ եք, որ Կատալոնիան դառնա անկախ պետություն»:
«Մինչ ես այստեղ 2 օր խոսում եմ բանկային, տնտեսական միությունների, ինտեգրման մասին, այն մասին, թե աշխարհում ինչ տեղ պետք է զբաղեցնի ԵՄ-ն, ոմանք ուզում են գնալ միջնադարյան ժամանակներ»,- ուրբաթ օրը Բրյուսելում ԵՄ գագաթնաժողովից հետո հայտարարել է Ռախոյը:
«Նրանք ցանկանում են անօրինական գործընթացը փոխարինել շատ ավելի հակաժողովրդավարականով»,- ասել է նա:
Ռախոյն ավելացրել է, որ իրավաբանական ծառայություններին հրահանգել է ուսումնասիրել հարցման անցկացման նախապատրաստությունը: «Լիովին վստահ եղեք, որ ինչպեսև նախորդ անգամ՝ եթե օրենքի թեկուզ փոքր խախտում կա, ես կդիմեմ Սահմանադրական դատարան»,- ասել է նա: