Փարիզում Պիկասոյի թանգարանը նորից բացում է իր դռներն այցելուների առաջ՝ վերակառուցումից հետո: Վերակառուցումը տևել է 5 տարի, արժեցել 22 մլն եվրո և արժանացել հանրության ոչ միանշանակ գնահատականին՝ հայտնում է BBC-ի ռուսական ծառայությունը:
XVII դարում պատմական Մարե թաղամասում կառուցված առանձնատան ներսի մասը վերակառուցման ընթացքում ընդլայնվել է, ինչը հնարավորություն է տվել մեծացնել բնական լուսավորմամբ ցուցասրահների տարածքը:
Ցուցահանդեսում ներկայացված է մոտ 400 նկար, քանդակ, կերամիկական և այլ գործեր:
Վերակառուցումից հետո շենքում ավելացել են ևս 2 հարկ և նոր ընդունարան, որը այժմ գտնվում է նախկին ախոռներում:
Որոշվել է նաև փորել նկուղ ու վերստեղծել այն ստուդիաները, որտեղ աշխատել է վարպետը:
Հինգ տարվա վերակառուցումն ուղեկցվել է սկանդալներով. ծախսերը գերազանցել են նախնական հաշվարկները, և թանգարանի բացումը 2 անգամ հետաձգվել է: Ի վերջո՝ իշխանությունները փոխել են թանգարանի տնօրենին:
