Վրաստանի նախկին նախագահ Միխեիլ Սաակաշվիլին մտահոգված է Վրաստանի կառավարության վատ աշխատանքով: Նա մասնակցել է Եվրոպայի ժողովրդական կուսակցության գագաթնաժողովին, գրում է «Գրուզիա Օնլայնը»:
«Ես առանձին զրույց եմ ունեցել Գերմանիայի կանցլեր Անգելա Մերկելի հետ: Դժբախտաբար, նա ասաց, որ մինչև ինձ հետ զրուցելն ինքը ոչինչ չի լսել Աբխազիայում Ռուսաստանի ծրագրերի մասին, Աբխազիայի բռնակցման մասին: Նա խնդրել է շտապ կապվել իր աշխատակազմի հետ:
Ես կփոխանցեմ այդ խնդրանքը Վրաստանի կառավարությանը, և հարց եմ տալիս`ինչ են նրանք արել մինչև հիմա և ինչու չեն կապվել: Ինչո՞ւ մինչև այսօր այդ հարցը բարձրագույն մակարդակով չեն դրել: Ի՞նչ կարող էր տեղի ունենալ դրանից կարևոր: Մի՞թե օտարերկրյա մամուլում հոդվածների հրապարակումը, ինչում ինձ մեղադրում են, կարևոր է այն բանից, ինչ անում է Ռուսաստանը:
Կարծում եմ` բոլորի արթնանալու ժամանակն է, եթե արդեն ուշ չէ, քանի որ որոշվում է Վրաստանի շատ սերունդների հարցը, որոշվում է Վրաստանի գոյության հարցը»,-հայտարարել է Սաակաշվիլին: