Հյուսիսատլանտյան դաշինքը Բալթիկայում «մկաններով է խաղում» Ռուսաստանի ենթադրյալ «ներխուժումների» ֆոնին, գրում է The Financial Times-ը: Թերթը նշում է, որ այս տարի տասնյակ «ռուսական պրովոկացիաներ» են տեղի ունեցել Արևելյան Եվրոպայի և Բալթյան երկրներում:
Ավելի վաղ հաղորդվում էր, որ Ռուսաստանի պաշտպանության նախարարությունը հերքում է էստոնական իշխանությունների հայտարարությունները, թե ռուսական ռազմաօդային ուժերի ինքնաթիռը ներխուժել է Էստոնիայի օդային տարածք:
Հաղորդվում էր նաև, որ դանիական երկու F-16 կործանիչ օդ են բարձրացել ռուսական ինքնաթիռների Դանիայի օդային տարածքի հնարավոր խախտման պատճառով տագնապից հետո: Տեղեկություն էր տարածվել նաև, որ Լատվիան «ռուսական հետախուզական նավ» է նկատել Բալթիկայի երկնքում:
Ընդհանուր թվով, ներկայումս ՆԱՏՕ-ի 16 կործանիչներ բարձր մարտական պատրաստականության վիճակում են՝ պարեկություն իրականացնելով Բալթյան երկրների և Արևելյան Եվրոպայի երկրների օդային տարածքում, մինչդեռ նախքան Ռուսաստանին Ղրիմի բռնակցումը դրանք ընդամենը 4-ն են եղել, ասվում է բրիտանական թերթի հոդվածում: Պարբերականը նշում է, որ այդպիսի ավելացումը «սառցաբեկորի գագաթն է»:
Վերլուծաբանների խոսքով՝ ՆԱՏՕ-ն դժվար թե մոտ ապագայում կրճատի նշված շրջաններում իր ուժերի տեղակայումը:
ՆԱՏՕ-ում աղբյուրների տեղեկատվությամբ՝ արևելաեվրոպական ավիաբազաների արդիականացման համար հատկացվում է ավելի քան 150 մլն եվրո:
Իսկ The Washington Times-ը գրում է, որ Ռուսաստանի որոշ «ռազմական պրովոկացիաներ» վկայում են «սառը պատերազմի» ոճով «խաղի արվեստի» վերադարձի մասին: Պարբերականը նշում է, որ «ռուսական կործանիչները» ստուգում են, մասնավորապես, ԱՄՆ-ի և Ճապոնիայի արձագանքը: