Օրերս Բուդաղյանների գործով դատական նիստին Գորիսում հարցաքննվել է Սյունիքի մարզպետ Սուրիկ Խաչատրյանի կինը՝ Լորետա Բարսեղյանը:
«Ես երկու կողմերին կոչ եմ անում, որ լինեն միայն խաղաղ, որպես մայր և կին՝ խնդրում եմ չտրվեն կողմնակի կրքերին, որոնք բորբոքում են կողմնակի անձինք, որովհետև մենք ունենք երկու վիրավոր, իսկ այդ վիրավորների և զոհի հաշվին որոշ մարդիկ շահեր են փնտրում այս գործի մեջ: Ես ուղղակի կոչ եմ անում և խնդրում եմ երկու կողմերին՝ սառը դատողությամբ վերաբերվեն այս ամեն ինչին, որովհետև մենք մեր քաղաքում ապրելու ենք շատ երկար, և չեմ ուզում լարված մթնոլորտում ապրենք»,- ասել է Լորետա Բարսեղյանը, նաև հավելել, որ ինքը ջանք չի խնայել կանխելու ողբերգությունը:
«Առաջին լրատվական»-ի հետ զրույցում Արտակ և Ավետիք Բուդաղյանների մայրը՝ Ալլա Բուդաղյանը, նշեց, որ տեղյակ չէ ցուցմունքից, բայց ինքը գիտի, որ Լորետա Բարսեղյանը ոչ մի բանով չի օգնել: «Նա կարող էր օգնել և շտապօգնություն կանչել»,- հուզված նշեց Ալլա Բուդաղյանը՝ այլևս չկարողանալով շարունակել:
Բուդաղյանների բարեկամներն «Առաջին լրատվական»-ի հետ զրույցում նշեցին, որ եթե նա իսկապես փորձել է ամեն բան անել կանխելու համար, նախևառաջ թող իր տղայի ձեռքի զենքը վերցներ և չթողներ կրակել, իր տղային թող հետ քաշեր, որ նա չկրակեր: Արտակի ատրճանակում փամփուշտ կա՞ր, որ նա քաշքշում էր, թող նման ձևով իր տղային հրեր, կանխեր…»,-հավելեցին նրանք:
Նրանք նշեցին, որ Լորետան եթե իսկապես ուզում էր օգնել, թող նախևառաջ մտածեր ինչ անել: Թող ոստիկանություն կանչեր, Ավոյի համար շտապօգնություն կանչեր: Դրանով նա կկանխեր ողբերգությունը, Ավոն կենդանի կմնար:
Անդրադառնալով Լորետա Բարսեղյանի ցուցմունքին, նրանք նշեցին, որ ինչ թելադրել է նրան ամուսինը, նա դա էլ ասում է դատարանում, և դրա համար էլ շատ հարցերի չի պատասխանում՝ պատճառաբանելով, որ դրանք մեղադրանքի ծավալի մեջ չեն մտնում, մինչդեռ պարտավոր էր պատասխանել: «Այս քայլով փորձում են ինքնապաշտպանության դիմել, տեսեք ինչպես է իրեն պահում նրանց փաստաբանը»:
Ինչ վերաբերում է Լորետա Բարսեղյանի՝ երկու կողմերին էլ խաղաղ լինելու, լարվածություն չստեղծելու կոչերին, Բուդաղյանների բարեկամները նշեցին. «Խորհուրդ կտայինք կոչ անի իր բարեկամներին, մասնավորապես՝ Լիսկայի եղբոր հարսին, ում հետ Լորետան շատ մոտ է: Նրանք են մեզ հրահրում, նրանք են մեզ վախեցնում, թե ինչու եք ելույթներ ունեցել: Ֆեյսբուքով ինչ ասես գրել են, ինչ ասես գրել են Արտակի մասին, ինչ վատ բառ ասես գրել են… Ձեր հարզատներին ասեք՝ իրենց նորմալ պահեն, ի՞նչ են անում Բուդաղյանները: Ավոյի ընտանիքը տեղափոխվել է Երևան, ապրում է Երևանում. Կինը՝ երեխաների հետ: Ո՞վ է մնացել այնտեղ, որ եսիմ ինչ անի ձեզ: Հո մարդասպան չե՞նք: Դուք ձեր հարազատներին կոչ արեք, որ իրենց կարգին պահեն, ոչ թե ամեն քայլափոխի մտնեն և ֆեյսբուքով ինչ-որ բաներ ասեն»,-ասացին նրանք:
Նրանք նշեցին, որ մեկին, որը Տիգրան Կարապետյանի ընկերն է և Գորիսում պետական կառույցում է աշխատում, Սուրիկ Խաչատրյանը հանում է աշխատանքից, ինչը դատապարտելի է: Ըստ նրանց՝ Սուրիկ Խաչատրյանին որպես գործիք հետ բերեց իշխանությունը և հիմա որպես գործիք էլ օգտագործում է:
«Ո՛չ ինքն է մարսելու, ո՛չ Լորետան, ո՛չ էլ տղան: Թող հինգ տարի էլ մարզպետ աշխատի, հանցանքը կփոխվի՞, մարդասպանությունը կփոխվի՞, այն ամենը, ինչ մարդկանց հանդեպ է արել, մի՞թե դա կփոխվի»,- հավելեցին նրանք: