Ճապոնիայի նախարարների կաբինետը որոշում է կայացրել փոփոխություն կատարել երկրում գործող ամենաանսովոր օրենքներից մեկում, որով արգելվում է գիշերային ժամերին պարել ակումբներում: Այս մասին հայտնում են Ճապոնիայի իշխանությունները:
Օրենքը, որը կարգավորում էր պարերը գիշերային ակումբներում, ներմուծվել էր 1940-ականների վերջին՝ հետպատերազմյան ավերածության ու աղքատության պայմաններում, երբ պարահրապարակները հաճախ ծառայում էին որպես մարմնավաճառությամբ զբաղվելու վայրեր: Այդ օրենքով՝ այն ակումբների ղեկավարները, որոնք պարահրապարակը բաց էին պահում կեսգիշերից հետո, ստիպված պետք է ունենային «մեծահասակների հաստատության» լիցենզիա, ինչը մի շարք լրացուցիչ սահմանափակումներ էր ենթադրում: Մյուս ակումբները ստիպված էին կեսգիշերին իրենց հաստատությունների դռները փակել այցելուների առջև:
Օրենքի նոր փոփոխության համաձայն՝ գիշերային ակումբները կարող են շարունակել իրենց աշխատանքը առանց հատուկ լիցենզիայի՝ սրահներում նվազագույն լուսավորվածության ապահովման պայմանով:
Սպասվում է, որ փոփոխությունը հավանության կարժանանա Ճապոնիայի խորհրդարանի ստորին պալատի կողմից ընթացիկ աշնանային նստաշրջանի ընթացքում:
Գիշերային ժամերին պարելու արգելքը երկար ժամանակ քննադատվում էր Ճապոնիայի հասարակության կողմից: