Վերաքննիչ քրեական դատարանի վարույթում է Աշոտ Կարապետյանի գործով բերված վերաքննիչ բողոքի քննությունը:
Գործը քննվել է Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ:
Դեպքը տեղի է ունեցել Երևանյան լճի հարակից տարածքում՝ մարմնավաճառների ու մարմնական փողոցային հաճույքների սիրահարների հավաքատեղիում:
Ըստ մեղադրանքի՝ 2014 թվականի ապրիլի 4-ի կեսգիշերին 33-ամյա Աշոտ Կարապետյանը Երևանյան լճի մերձակայքում միջամտել է իր մեքենայի ուղևոր, մարմնավաճառ Նարինե Հ.-ի և Նորայր Հովհաննիսյանի միջև ծագած վիճաբանությանը:
Աշոտ Կարապետյանը բռունցքով երեք հարված է հասցրել Նորայրի ձախ աչքի ու այտոսկրի հատվածին՝ պատճառելով ճակատային թմբկության, ձախ աչքի ակնագնդի արյունազեղման, զուգակցված բաց թափանցող գանգուղեղային վնասվածքի, դիմային, գանգի ոսկրերի, ճակատոսկրի խրթեշի, ճակատային ծոցի հետին պատի, անցումով՝ առաջային գանգափոս, ձախից սեպոսկրի գծային կոտրվածքների ձևերով վնասվածքներ, որոնք ուղեկցվել են գլխուղեղի թեթև աստիճանի սալջարդով, պնեմոցեֆալիայով:
Տուժողի առողջությանը պատճառվել է կյանքին վտանգ սպառնացող ծանր վնաս:
Ընդհանուր իրավասության դատարանում ամբաստանյալ Աշոտ Կարապետյանն իրեն մեղավոր է ճանաչել և միջնորդել, որ գործը քննվի արագացված ընթացակարգով:
Դատախազը միջնորդել է, որ դատարանը Աշոտ Կարապետյանին մեղավոր ճանաչի մեղսագրված արարքի՝ դիտավորությամբ տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Մեղադրողը թվարկել է ուշադրության արժանի հետևյալ հանգամանքները. ամբաստանյալի խնամքին են 1, 5 և 7 տարեկան երեք մանկահասակ երեխաները: Նա ութ հոգուց բաղկացած ընտանիքի միակ կերակրողն է: Ինքնակամ ներկայացել է, տվել խոստովանական ցուցմունքներ, աջակցել հանցագործության բացահայտմանը, զղջացել է կատարածի համար: Գործով ծանրացուցիչ հանգամանքներ ի հայտ չեն բերվել:
Այս ամենով հանդերձ՝ մեղադրողը միջնորդել է Աշոտ Կարապետյանին դատապարտել 4 տարի ազատազրկման:
Տուժողը պահանջել է իր բուժման ծախսերի հատուցում: Ընդունել է, որ ամբաստանյալի հարազատները իրեն մի «ՌԱՖ» են տվել՝ այդ նպատակով, բայց մեքենան ինքը վաճառել է… 100 հազար դրամով:
Իր բուժման համար տուժողը պահանջել է ևս 150 հազար դրամ: «Էս կողմս՝ ձախ թուշս, փտում ա, փտում…»,- ասել է տուժողը:
Հետագայում տուժողը խաղաղվել է, բավարարվել ու դատարանին խնդրել ամբաստանյալի նկատմամբ մեղմ պատիժ նշանակել՝ ասելով, թե նրանից այլևս պահանջ չունի:
Ընդհանուր իրավասության դատարանը Աշոտ Կարապետյանին մեղավոր է ճանաչել մեղսագրված արարքի համար ու դատապարտել է 3 տարի ազատազրկման: Այս պատժին հաշվակցվել է նախնական կալանքի տակ մնալու ժամանակը, և վերջնական պատիժ է նշանակվել 2 տարի 11 ամիս 27 օր ազատազրկում: Պատժի սկիզբը՝ 2014 թվականի մայիսի 7-ից:
Դատավճիռը պատժի մասով բողոքարկել է Աշոտ Կարապետյանի շահերի պաշտպանը՝ միջնորդելով իր պաշտպանյալի նկատմամբ պայմանական դատապարտություն կիրառել ու սահմանել փորձաշրջան՝ նրան ազատելով կալանքից:
Ահա թե ինչ է «արժեցել» մարմնավաճառուհու սպասարկումը երեք մանկահասակ երեխաների հայր, խնամքին յոթ անձ ունեցող Աշոտ Կարապետյանի համար:
