Այսօր տեղի է ունեցել ԱԺ խմբակցությունների բրիֆինգը, ստորև ներկայացնում ենք «Ժառանգություն» խմբակցության ղեկավար Ռուբիկ Հակոբյանը:
–Ի՞նչ սպասելիքներ ունեք այսօրվա հանրահավաքից, ի՞նչ սպասելիքներ ունի հասարակությունը:
–Այսօր պետք է լինի ռեալ արդյունքների ձևակերպում:
–Դուք պարբերաբար Ձեր ելույթներում իշխանափոխության վերաբերյալ ասում էիք, որ ակնկալում եք, որ իշխանությունները իմաստնություն կունենան սեփական կամքով հեռանալ իշխանությունից: Հիմա հույսը դրված է իշխանությունների իմաստնության վրա՞, որը, Ձեր կարծիքով, գոյություն չունի, և եթե ոչ, ապա իշխանափոխության հարցում հույսն առհասարակ ինչի՞ վրա է դրված:
–Ես նման ձևակերպումներ չեմ տվել: Ես ասել եմ, և եթե հետադարձ հայացքով մոտենանք, թե ինչպես ձևավորվեց այս չորս քաղաքական ուժերի համագործակցությունը, ապա առաջին անգամ իմ կողմից հայտարարվեց, որ մեր այսօրվա իրական այլընտրանքը իշխանություններին կարող է լինել այն, որ չորս քաղաքական ուժերի ղեկավարները, առանց խաղեր տալու, տղամարդավարի, վստահաբար կողք կողքի կանգնեն հրապարակում և ասեն, որ իշխանությունն իրեն այլևս սպառել է, և պետք է արմատական փոփոխություններ անել:
Մենք միշտ էլ ասել ենք. լավագույն տարբերակը, որ իշխանություններն ու այս քաղաքական ուժերը մեկտեղեն իրենց ուժերը և գնան արմատական լուծումների, և եթե այդ լուծումների կամ բանակցությունների արդյունքում անհրաժեշտ է նաև իշխանափոխություն, ապա պետք է իշխանությունը նաև դրան համաձայնի: Եվ հիմա էլ կարծում եմ, որ շատ ավելի ճիշտ կլինի, շատ ավելի սահուն կլինեն արմատական փոփոխությունները, եթե իշխանությունները համարժեք գնահատեն ստեղծված իրավիճակը և նույնիսկ իրենք նախաձեռնեն, որնստեն մեծ սեղանի շուրջ, քննարկեն ստեղծված իրավիճակը և դեղատոմս առաջարկեն: Իսկ եթե ոչ, ապա առանց իշխանության պետք է դա անել:
-Դրված է իշխանափոխության հարց, և մենք առաջին հերթին ուշադրություն ենք դարձնում արդյունքի վրա, քան լոզունգների: Մեր քաղաքական մշակույթը, եթե հետադարձ հայացքով նայենք՝ երբեմն քաղաքական ուժերը, շարժումները, գերի են դարձել ինչ-որ լոզունգների, որով պարտվել են: Պետք է ավելի շատ կարողանալ սկզբունքորեն ինչ-որ սցենար ունենալ, թե ինչպես հասնել արդյունքի, ոչ թե այնպես անել, որ գեղեցիկ լոզունգներ լինեն, որոնք ճանապարհի կեսին դատապարտվում և պարտվում են:
Միասնական օրակարգը հրապարակված է: Միասնական օրակարգի ընդհանուր ձևակերպումն է՝ այս քաղաքական ուժերը միասին գնում են իշխանափոխության: Ինչ վերաբերում է ճանապարհային քարտեզին, ապա կրկնում եմ, որ որոշակի խմբագրման ընթացքի մեջ է, յուրաքանչյուր քաղաքական ուժ ունի իր մոտեցումը, իր սցենարը: Կան որոշակի չպայմանավորված, չհամաձայնեցված հարցեր, որոնք, կարծում եմ, գոնե միտինգի պահին, կամ մինչև միտինգը կունենան իրենց լուծումը: