Բրիտանական Սքոթլենդ-Յարդը 425 հազար ֆունտ ստերլինգ (680 հազար դոլար) կվճարի կնոջը, որը 25 տարի առաջ որդի էր ունեցել ոստիկանից, որը գործել է ծպտված ու հետևել նրան, հայտնում է The Guardian-ը:
Ներկայումս կնոջ իսկական անունը գաղտնի է պահվում: Նա հրաժարվել է բարոյական ու հոգեբանական վնասի փոխհատուցումից: Ոստիկանությունն իր հերթին չի ընդունել մեղքը:
The Guardian-ը գրում է, որ կնոջ համար իր որդու մասին ամբողջ ճշմարտությունն իմանալը հոգեբանական հարված է եղել: Նրան ինքնասպանության մտքեր են այցելել, ու նա ստիպված է եղել դիմել հոգեբանների օգնությանը:
2012-ին պարբերականը հոդված էր տպագրել, որ բիտանական ոստիկանությունը երկար ժամանակ հետևել է արմատական քաղաքական ու հասարակական խմբերին՝ նրանց շարքում ներդնելով ծպտյալ ոստիկանների:
Կինն ու ոստիկանության գործակալ Բոբ Լամբերտը ծանոթացել էին 1984-ին, նրանց միջև սիրավեպ էր սկսվել, և կինը երեխա էր ունեցել: Նա չի իմացել, որ իր սիրեցյալը իրականում ամուսնացած է և երեխաներ ունի: 1988-ին Լամբերտը հեռանում է նրանից՝ ստելով, թե պետք է արտասահման փախչի, այնինչ իրականում վերադարձել է ոստիկանություն աշխատանքի:
Պաշտոնից հեռանալուց հետո Լամբերտը դառնում է համալսարանի պրոֆեսոր: 2011-ին մի խումբ ակտիվիստներ նրան ճանաչում են և ստիպում խոստովանել, որ աշխատել է ոստիկանության համար: