Այսօր կայանալու է Եռյակի հանրահավաքը, որտեղ, ինչպես հայտարարել է ԲՀԿ-ն, ծրագրային ելույթով հանդես է գալու ԲՀԿ առաջնորդ Գագիկ Ծառուկյանը:
«Հայբուսակ» համալսարանի ԲՀԿ-ական ռեկտոր Անահիտ Հարությունյանը «Առաջին լրատվականի» հարցին՝ մասնակցելո՞ւ է արդյոք հանրահավաքին, բացասական պատասխան տվեց. «Չէ, ես հանրահավաքների չեմ մասնակցում ընդհանրապես, երբևէ չեմ մասնակցել»: Երբ հարցրինք, թե ի՞նչն է պատճառը, Անահիտ Հարությունյանն անջատեց հեռախոսը:
Հիշեցնենք, որ 2011 թ. մամուլում տեղեկություն հրապարակվեց, որ ի պատասխան հարցի՝ ի՞նչ է անելու, եթե «Բարգավաճ Հայաստան» կուսակցությունը որոշի դուրս գալ կոալիցիայից ու պայքարել Սերժ Սարգսյանի դեմ, Անահիտ Հարությունյանն ասել էր. «Եթե իմ ընտրած քաղաքական ուժը դեմ գնա ներկա նախագահին` Սերժ Սարգսյանին, ապա ես առանց տատանվելու չեմ մնա այն քաղաքական ուժի շարքերում, որը դեմ է իմ ընտրած և ընտրվելիք նախագահին»: Առայժմ Անահիտ Հարությունյանը չի լքել ԲՀԿ-ն:
Մինչ հանրահավաքին մասնակցության մասին հարցնելը, տիկին Հարությունյանից հետաքրքրվեցինք՝ ինչպե՞ս է վերաբերվում կրթության և գիտության նախարար Արմեն Աշոտյանի ԱԺ-ում արած հայտարարությանը, թե մասնավոր բուհերը տարիներով գումար են աշխատել՝ անորակ կրթություն տալով: «Բոլոր բուհերի համար չեմ կարող ոչինչ ասել: Եթե ինքն ասում է, հավանաբար, հատ-հատ մտել, ստուգել է բոլոր բուհերը, չգիտեմ, ես չեմ կարող ասել»,- ասաց «Հայբուսակի» ռեկտորը:
Ինչպես հայտնի է՝ արդեն երրորդ տարին է՝ Հայաստանում գործող 30-ից ավելի մասնավոր բուհեր ընդունվելու համար դիմորդները քննություններ են հանձնում միասնական համակարգով: Այս կարգը սահմանող կառավարության համապատասխան որոշման հետևանքով մասնավոր բուհեր ընդունվողների թիվը վերջին երեք տարիներին շեշտակի նվազեց՝ գրեթե 90 տոկոսով: Ամենացածր ցուցանիշը գրանցվեց այս տարի՝ դիմորդների 12 հազար կազմող ընդհանուր թվի պարագայում ոչ պետական բուհեր է դիմել ընդամենը 20 դիմորդ:
«Ես այդ թեմայով ընդհանրապես չեմ ուզում խոսել, որովհետև էնքան անհեթեթ իրավիճակում է այսօր մեր բարձրագույն կրթությունը հայտնվել հենց դրա պատճառով, որ ես ընդհանրապես ասելիք չունեմ»,- ասաց «Հայբուսակի» ռեկտորը: Մեր հարցին, թե իրենք ինչ որ քայլեր անո՞ւմ են, Անահիտ Հարությունյանը այսպիսի պատասխան տվեց. «Ինչ քայլ, ոչ մի քայլ էլ չենք անում, ընդունում ենք, աշխատում ենք, իսկ ի՞նչ պետք է անենք, ձեր կարծիքով: Ի՞նչ է հնարավոր անել, եթե կարգն էդպես է, բոլորն էլ էդպես պետք է աշխատեն»:
Լուսանկարը՝ hayeli.am-ի