iPhone սմարթֆոնի առաջին մոդելը շուկայում հայտնվել է 2007-ին: Art-on.ru կայքը ներկայացնում է սմարթֆոնի փոփոխությունները՝ սկսած 2007-ից:
Առաջին սերնդի iPhone-ը, որը ներկայացվել է 2007-ի հունվարի 9-ին MacWorld ցուցահանդեսում, ուներ ալյումինե հետին պանել, իսկ ստորին հատվածում՝ պլաստիկե փոքրիկ կափարիչ, որը ծածկում է GSM ընդունիչի և Wi-Fi/Bluetooth-ի ալեհավաքները:
Դրանից մեկ տարի անց թողարկվեց iPhone 3G-ն՝ նոր պլաստիկե դիզայնով և երկու մեգապիքսելանով տեսախցիկով:
2009-ին ներկայացված iPhone 3GS-ն ուներ նոր մարտկոց և պրոցեսոր, 3 մեգապիքսել հզորությամբ տեսախցիկ և օպերացիոն համակարգի երրորդ տարբերակ:
Հաջորդ տարի ընկերությունը ներկայացրեց միանգամայն նոր iPhone 4-ը՝ նոր կորպուսով և համապատասխան օպերացիոն համակարգի տարբերակով, ինչպես նաև ճակատային տեսախցիկով և Retina էկրանով:
2011-ին դուրս եկավ iPhone 4S-ը, որն արտաքուստ գրեթե չէր տարբերվում իր նախորդից, սակայն ընկերությունում վաճառքները կտրուկ աճեցին:
2012-ի սեպտեմբերի 12-ին Սան Ֆրանցիսկոյում ներկայացվել է նոր սերնդի iPhone-ը (iPhone 5):
2013-ին ընկերությունը միանգամից թողարկեց երկու սմարթֆոն՝ iPhone 5S և iPhone 5C: Նրանցից առաջինն ուներ մատնահետքերի սքանավորման Touch ID գործառույթ, երկրորդը՝ պլաստիկե կորպուս:
Ամենազգալի փոփոխությունները, սակայն, կրել են 2014-ին ներկայացված iPhone 6-ը և iPhone 6 Plus-ը: Թարմացվել են նրանց էկրանները՝ ստանալով Retina HD անվանումը: