Եռյակն իր խնդիրներն է քննարկում, մենք մեր խնդիրներն ունենք` երեկ ՀՀԿ գործկոմի նիստից հետո հայտարարել է ՀՀԿ խոսնակ Էդուարդ Շարմազանովը: Նա ասել է, որ նիստի ընթացքում փոխվարչապետի հարց չեն քննարկել, միաժամանակ ասել է, որ քննարկել են առաջիկա օրերին կայանալիք Սարգսյան-Ալիև հանդիպումը Ֆրանսիայում` այդ երկրի նախագահ Օլանդի նախաձեռնությամբ:
Միևնույն ժամանակ, երեկ «Նյու Յորք թայմսում» ներդիրով հրապարակվել է Սերժ Սարգսյանի հարցազրույցը, որտեղ նա խոսում է Հայոց ցեղասպանության, միջազգային հանրության դիրքորոշման մասին: Սրան զուգահեռ` հիշենք, որ Սերժ Սարգսյանը խոստացել է սահմանադրական փոփոխությունների մասին վերջնական կարծիք հայտնել փետրվար-մարտին: Այս ամենը ցույց են տալիս, թե ինչ է Շարմազանովի հայտարարությունների կոնտեքստում: Շարմազանովն ասել է, որ եռյակի հանրահավաքը Սերժ Սարգսյանին չի մտահոգում:
Ակնհայտ է, որ Սարգսյանին մտահոգում է այլ բան՝ առաջիկա գարնանն ընդառաջ ակտիվացնել արտաքին քաղաքական օրակարգն ու հասարակական ուշադրությունը կենտրոնացնել դրա վրա` այսպիսով վերցնելով քաղաքական նախաձեռնությունը եռյակից և արտաքին զարգացումների ներքո զբաղվել նաև ներքին հարցերով, մասնավորապես սահմանադրական փոփոխություններով: Ակնառու է, որ Սերժ Սարգսյանն աստիճանաբար պատրաստվում է արտաքին օրակարգի գերակայության հաստատմանը: Թե ինչքանով դա կստացվի նրա մոտ, այն էլ երկրորդ անգամ՝ 2008-ի «ֆուտբոլային դիվանագիտությունից» հետո, ժամանակը ցույց կտա, սակայն որ մտադրություններն առկա են և արդեն իսկ հստակ են միտումները, կարծեք թե կասկածից դուրս է: Այդ պատճառով էլ Շարմազանովն ասում է, որ իրենք իրենց խնդիրներն ունեն:
Այդ խնդիրների լուծման հարցում ձախողումը կամ անարդյունավետությունն է, որ Սերժ Սարգսյանի մոտ կարող է մտահոգություններ առաջացնել և առաջին հերթին այն մասով, որ արտաքին օրակարգի տապալումը կնշանակի տապալում արտաքին լեգիտիմության մասով, և սա արդեն Սերժ Սարգսյանի համար իսկապես լուրջ մտահոգությունների պատճառ է, որովհետև նա, ըստ էության, իշխանությունը պահում է արտաքին օրակարգի խաղարկումով, և եթե այստեղ անկում արձանագրվի, ապա իշխանության անկումը նրա համար կդառնա արդեն ժամանակի հարց: Իսկ եթե արտաքին օրակարգում հաջողվի պահել առնվազն ներկայիս մակարդակը, ապա եռյակի գործողություններն արդեն Սերժ Սարգսյանի համար, ըստ էության, մեծ վտանգներ չեն պարունակում, հատկապես որ եռյակն էլ իր հաջողություններն ակնհայտորեն պայմանավորում է, այսպես ասած` ուղիղ համեմատական է դիտում արտաքին օրակարգի մասով Սերժ Սարգսյանի անհաջողություններին:
