Ուկրաինայի գլխավոր խնդիրը Ղրիմի կորուստը չէ կամ երկրի արևելքում պատերազմը, այլ սեփական քաղաքացիների կողմից Կիևի իշխանությունների նկատմամբ անվստահությունը և վերջիններիս կողմից նորմալ գործող պետություն ստեղծելու անկարողունակությունը, գրում է Der Spiegel-ը:
«Պյոտոր Պորոշենկոն այժմ լավ հնարավորություն ունի իր իշխանությունը վերջնականապես ամրապնդելու համար՝ ստանալով Գերագույն ռադայի ձայների մեծամասնությունը… Սակայն առայժմ հայտնի չէ՝ կօգտագործի՞ նա այդ իշխանությունը, որպեսզի վերջ դնի պատերազմին, պայքարի կաշառակերության դեմ և կանգնեցնի երկրի անկումը, թե՞ Ուկրաինայի կործանումը կշարունակվի»,- գրում է պարբերականը:
Der Spiegel-ը մեջբերում է Ուկրաինայի տարբեր քաղաքների բնակիչների արտահայտությունները, որոնց վկայությամբ, պարբերականի կարծիքով, իշխանությունների և քաղաքացիների միջև փոխըմբռնման կորուստ է տեղի ունենում:
Զապորոժյեի շրջանային պետադմինիստրացիայի նախագահ Վալերի Բարանովը հայտարարել է, որ «Մայդանի նշանակած կառավարությունը իրականության մասին գաղափար անգամ չունի»: Նրա խոսքերով՝ Կիևը պետք է ուկրաինական շրջաններին ավելի շատ անկախություն տրամադրի: Ներկա պահին Զապորոժյեի տնտեսությունը լրջորեն տուժում է ռուսական շուկայի հետ կապերի խզման պատճառով:
Լվովի բնակիչները մատնանշում են պետության կողմից քաղաքացիների կարիքների նկատմամբ անտարբերությունը, գրում է պարբերականը՝ հղում անելով գրող Նատալկա Սնյադանկոյին: Կինը պատմել է, որ քաղաքաբնակները ինքնուրույն են օգնել բանակին, քանի որ, նրանց կարծիքով, իշխանությունները ի վիճակի չէին հաղթահարել այդ խնդիրը: Նույնիսկ «Սվոբոդա» ազգայնական կուսակցությունը, որին նախկինում աջակցում էին Լվովում, ինքն իրեն վարկաբեկել է ԶԼՄ-ների վրա ճնշում գործադրելու և սեփական հարստացման համար քաղաքական իշխանությունը օգտագործելու պատճառով, գրում է Der Spiegel-ը:
Օդեսան գերմանական պարբերականը «անօրինականության գոտի» է անվանում: Քանի որ ոստիկանները չեն հասկանում, թե բարիկադների որ կողմում պետք է կանգնեն, նրանք թաքնվում են: Քաղաքում կարգուկանոնին հետևում են «Աջ սեկտորի» ազգայնականները, ընդ որում, նրանք ոգևորվում են անպատժելիությունից, պնդում է Der Spiegel-ը:
Խարկովում շարունակվում է պայքարը տարբեր քաղաքական ուժերի միջև: Նոր իշխանությունները հնարավորություն են տալիս ծայրահեղականներին փողոցներ զավթել, որի մասին է վկայում Լենին արձանի ոչնչացումը, գրում է Der Spiegel-ը:
