«Բարգավաճ Հայաստան» խմբակցության պատգամավոր Միքայել Մելքումյանը կարծում է, որ կառավարության ներկայացրած «Սահմանամերձ գյուղական համայնքներում իրականացվող գործունեությունը հարկերից ազատելու մասին» օրինագծի կիրառման էֆեկտիվությունը թույլ է լինելու:
Ազգային ժողովն այս շաբաթ տեղի ունեցած քառօրյայի ժամանակ հրատապ կարգով և առաջին ընթերցմամբ քննարկեց այդ նախագիծը, որը հարկային արտոնություններ է սահմանում սահմանամերձ մոտ 40 գյուղական համայնքներում գործող տնտեսվարող սուբյեկտների համար: Մ. Մելքումյանը կարծում է, որ այդ օրինագծի էֆեկտիվությունը յուրաքանչյուր տնտեսվարողի համար լինելու է օրական 100 դրամ:
«Պաշտոնական վիճակագրությամբ՝ մեր երկրում կան 58 հազար յոթ հարյուր շրջանառության հարկ մուծողները: Դրանցից 40 հազարը ցույց են տալիս տարեկան մինչև 5 մլն դրամ շրջանառություն: Եթե այդ 5 միլիոնը վերածենք ամիսների և օրերի, կլինի 1 օրում 10-12 հազար դրամ շրջանառություն: Այսօր շրջանառության հարկը 1 տոկոս է, չէ՞: Իսկ 10-12 հազար դրամի 1 տոկոսը 100-120 դրամ է: Եվ եթե մենք սահմանամերձ համայնքներում զրոյացնում ենք հարկերը, դրա էֆեկտիվությունը յուրաքանչյուր օրվա համար լինում է 100 դրամի արտոնություն: Մինչդեռ շրջանառության փաստաթղթավորումը ավելի թանկ է, քան այդ 100 դրամի արտոնությունը»,- ասում է պատգամավորն ու ավելացնում, որ, այնուամենայնիվ, ԲՀԿ-ն դեմ չէ այդ արտոնություններին:
Մ. Մելքումյանը կառավարության այս նոր օրինագծի կիրառման դեպքում նաև խնդիրներ է տեսնում: Օրինակ՝ չի բացառվում, որ այլ վայրերից տնտեսվարողները, անգամ խոշոր գործարարները կարող են իրենց բիզնեսը տեղափոխել այդ սահմանամերձ համայնքներն ու այդպիսով ազատվել հարկերից:
«Օրինակ՝ խոշոր ձեռնարկությունը սահմանամերձ գոտում դնում է մի փոքրիկ տաղավար կամ մասնաճյուղ, և վարչարարության մեջ ինչպե՞ս ես ճշտելու, թե իրացման մեջ ո՞րն է այդ գյուղում արտադրվածը, որը մայր գործարանում արտադրվածը: Այսինքն՝ այդ վարչարարության ծախսերն ավելի շատ են լինելու, քան թե իրական արտոնության էֆեկտն է:
Եվ երրորդը՝ ասում են՝ ֆինանսատնտեսական բարեփոխում ենք անում: Ֆինանսականը կա հարկային մասով, բայց տնտեսական մասը բացակայում է: Ո՞ւր է էկոնոմիկայի նախարարությունը, որ գնահատի և ասի, թե սահմանամերձ գոտու այդ մոտ 40 համայնքների ներդրումային կարողությունն այսքան եմ գնահատում և ինչ եմ ակնկալում այս արտոնություններից: Իմ կանխատեսմամբ՝ էֆեկտը թույլ է լինելու»,- եզրափակեց ԲՀԿ-ական պատգամավորը:
