Մաղթում եմ, որ Փարիզում Ալիև-Սարգսյան հանդիպումն առանմց արդյունքի չավարտվի: Այս մասին այսօր Երևանում լրագրողների հետ զրույցում ասաց Գերմանիայի ԱԳ նախարար Ֆրանկ Վալտեր Շտայնմայերն՝ անդրադառնալով Փարիզում օրերս կայանալիք Ալիև-Սարգսյան-Օլանդ գագաթնաժողովին: Նա նշեց, որ մի քանի օր է մնացել Հայաստանի և Ադրբեջանի նախագահների հանդիպմանը Փարիզում: Նրա խոսքով՝ բնականաբար, Գերմանիային ևս հետաքրքրում է հետևյալ հարցը՝ արդյո՞ք կարող ենք ակնկալել ԼՂ հակամարտության լուծման հարցում առաջընթաց, թե ոչ:
«Որևէ բան այսօր ասել չենք կարող, տեսնում ենք, որ պատրաստակամություն են ցուցաբերում կոնֆլիկտի կողմերը՝ այս պատի առջև կանգնած կոնֆլիկտի լուծման համար: Մենք հուսով ենք, որ այստեղ մեր արևելյան հարևան տարածաշրջաններում խաղաղություն կբերենք, առաջընթացներ հնարավոր կլինեն, առաջին քայլերը պետք է արվեն նախագահների կայանալիք հանդիպման ժամանակ: Կարևոր է, որ կողմերը պատրաստ են հանդիպելու, հետևեցին Օլանդի հրավերին, մաղթում եմ, որ հանդիպումն առանց արդյունքի չավարտվի»,- ասաց Շտայնմայերը: