Armtimes.com-ը գրում է. «Հայաստանի գյուղական բնակավայրերում յուրաքանչյուր 4-րդ երեխան թերաճ է: Եւ սա անմիջականորեն կապված է մեր երկրում աղքատության մակարդակի հետ:
Այն մարզերում, որտեղ աղքատության մակարդակը բարձր է, թերաճության ցուցանիշը եւս բարձր է: Այս մասին նշված է ՕՔՍՖԱՄ հայաստանյան մասնաճյուղի եւ «Բի Էս Սի» բիզնեսի աջակցման կենտրոնի կատարած հետազոտության եզրակացության մեջ, որը հրապարակվել է մի քանի օր առաջ: Եվրամիության կողմից ֆինանսավորված այս ծրագրով ուսումնասիրվել են Հայաստանի մարզերում բնակչության պարենային զամբյուղը եւ սննդային կառուցվածքը, գնահատվել է սնման «գինը» Հայաստանում՝ 2002-2012 թվականների կտրվածքով:
Տասը տարվա ընթացքում թերաճ երեխաների թիվը 13 տոկոսից հասել է 19 տոկոսի: Թերաճության առումով ամենախոցելի մարզերն են Գեղարքունիքը, Արարատը եւ Արագածոտնը: Գեղարքունիքն արդեն 10 տարի այս ցանկում է:
Այն մարզերում, որտեղ գրանցվել է թերաճության բարձր մակարդակ, գերքաշության մակարդակը եւս բարձր է եղել: Թերսնումը երեխաների շրջանում բերել է նաեւ սակավարյունության աճի: Եթե 2000թ. սակավարյունություն է ունեցել երեխաների 24 տոկոսը, ապա 2005-ին՝ 37 տոկոսը:
Ըստ հետազոտության արդյունքների, երեխաների սնուցման վիճակը վատթարացող է հատկապես գյուղական բնակավայրերում ապրող աղքատ տնտեսություններում: Հանրապետությունում մինչեւ 59 ամսական երեխաների թերսնման պիկը գրանցվել է 2005 թվականին՝ 5 տոկոս: 2000 թվականին թերսնված է եղել մինչեւ 59 ամսականների 2,5-3 տոկոսը, 2010-ին՝ 4 տոկոսը:
15 տարեկանից բարձր մարդկանց շրջանում, կապված թերսնման հետ, վերջին 10 տարիների ընթացքում աճել են քրոնիկ հիվանդությունները: Եթե 2000 թվականին շաքարային դիաբետով տառապում էր 40 հազար մարդ, ապա 2012-ին այդ թիվը հասել է 60 հազարի: Եթե 2005 թվականի տվյալներով սրտի իշեմիկ հիվանդությամբ տառապում էր 38 հազար, ապա 2012-ին՝ 62 հազար մարդ: Ռեկորդ է գրանցել արյան ճնշման հետ կապված հիվանդություններ կրողների թիվը՝ 2000-2012 թվականների ընթացքում աճելով մոտ երեք անգամ՝ 37 հազարից հասնելով 102 հազարի:
Հայաստանում մեկ շնչի հաշվով օրական սպառված սննդամթերքի էներգետիկ արժեքի ցուցանիշները նույնպես մտահոգիչ են: 2002-2012թթ. ընթացքում միայն 2007 թվականին է, որ սննդամթերքի սպառման հանրապետական միջինը բարձր է եղել Ազգային վիճակագրական ծառայության եւ Համաշխարհային բանկի կողմից սահմանված օրական անհրաժեշտ 2232 կիլոկալորիա ցուցանիշից: Մնացած տարիների համար գրանցվել է կալորիաների սպառման դեֆիցիտ:
Ամբողջությամբ՝ սկզբնաղբյուր կայքում