Այսօր կառավարության շենքի դիմաց կրկին բողոքի ակցիա էին իրականացնում Եկմալյան փողոցի խաբված բնակիչները, ովքեր տարիներ շարունակ չեն կարողանում ստանալ իրենց բնակարանները:
Հիշեցնենք, որ 2006 թվականին պետության կարիքների համար մարդկանց բնակարանները քանդեցին, և առ այսօր բնակիչները կռիվ են տալիս իրենց բնակարանները հետ ստանալու համար: «Այսօր արդեն 8-րդ տարին է՝ մենք փոխհատուցում չենք ստանում: Ընդամենը եղել են դատարկ խոստումներ: Փոխհատուցում բնակարանի տեսքով կամ գումարի տեսքով չի եղել»,-կառավարության առջև «Առաջին լրատվական»-ի հետ զրույցում բողոքեցին բնակիչները: Նրանց խոսքով՝ Հովիկ Աբրահամյանը տեղյակ է իրենց խնդրին, բայց հարցին լուծում չի տալիս:
«Մինչև հիմա Եկմալյանում ոչ մի բան չի կառուցվել: Ես խոսել եմ ֆինանսների նախարարության աշխատակցի հետ, որն զբաղվում է այդ հարցով: Նա ասաց, որ երկու տարի է՝ աճուրդի է դրված Եկմալյանը, բայց գնորդ չկա: Բայց մինչ դա գնեն, շենք կառուցեն ու մեզ տուն տան, դա կլինի՝ «էշ մի սատկի, գարուն կգա»: Ես 10 տարի հետո էլ ի՞նչ եմ անում տունը, երբ երեխաներս էլ էստեղ չեն լինի»,-դժգոհեց մեկ ուրիշ քաղաքացի:
Եկմալյան փողոցի՝ տնից զրկված բնակիչները Հովիկ Աբրահամյանից պահանջում էին իջնել, լսել իրենց խնդիրը և իրենց ապահովել բնակարաններով:
