Վենեսուելայի նախագահ Նիկոլաս Մադուրոն ԱՄՆ-ին մեղադրել է ողջ մոլորակին վնաս հասցնելու մեջ, որը նավթի արդյունահանման մեջ կիրառում է շերտի հիդրոպայթյունի (այսպես կոչված՝ ֆրեքինգ) մեթոդը: Այս մասին հայտնում է Noticias24 պարբերականը:
«Դա վայրենի մեթոդ է, այն կործանում է Երկիր մոլորակը»,- հայտարարել է Մադուրոն Վենեսուելայի կառավարության դաշնային խորհրդի նիստի ժամանակ:
Ֆրեքինգը վերջերս գնալով ավելի հաճախ է նշվում որպես թերթաքարային ածխաջրածինների արդյունահանման միջոց: Տեխնոլոգիան ամենավիճելիներից և ոչ էկոլոգիականներից մեկն է օգտակար հանածոների արդյունահանման ոլորտում: Տեխնոլոգիան արգելված է մի շարք երկրներում:
Մադուրոն նշել է, որ ԱՄՆ-ը ֆրեքինգի միջոցով օրական արտադրում է 9.5 մլն բարել նավթ:
Մադուրոն նկատել է, որ ֆրեքինգի մեթոդով արդյունահանվող նավթը, միևնույն է, ավելի թանկ արժե, քան վենեսուելական նավթը: «Փորձագետները կարծում են, որ այն կարժենա 100 դոլարից ավելի և հետագայում աճի միտում ունի»,- ասել է նախագահը: