Օտտավայում կրակ բացած տղամարդը հավանաբար ենթարկվել է ԴԱԻՇ («Իրաքի և Շամի իսլամական պետություն») ահաբեկչական խմբավորման քարոզչության ազդեցությանը: Այդ դեպքն ունի ահաբեկչական հարձակման բոլոր նշանները: Այսպես է կարծում Կանադայի Ազգային անվտանգության հեղինակավոր փորձագետներից մեկը՝ Տորոնտոյի համալսարանի պրոֆեսոր Ուեսլի Ուորքը՝ փոխանցում է Ria Novosti-ն:
«Ես կարծում եմ, որ այդ մարդը մտել է ԴԱԻՇ-ի կայքերը, ենթարկվել քարոզչության և, հնարավոր է, ոգեշնչվել ջիհադիստների մասին այլ նյութերից, որոնք տեսել է համացանցում»,- ենթադրել է պրոֆեսորը՝ պատասխանելով հարցին, թե դեպքը կարո՞ղ է կապված լինել ԴԱԻՇ-ի սպառնալիքների և Կանադայի արտաքին քաղաքականության հետ:
Նա ընդգծել է, որ դեռևս ոչինչ հայտնի չէ տվյալ հարձակումները նախաձեռնողի մասին:
Պրոֆեսորի կարծիքով՝ վերջին իրադարձությունները չեն հանգեցնի անվտանգության ոլորտում Կանադայի քաղաքականության փոփոխության: Նա ընդգծել է, որ առայժմ վաղ է խոսել Կանադայի հատուկ ծառայությունների ձախողման մասին:
