Նավթի համաշխարհային գները հինգշաբթի շարունակում են անկումը ԱՄՆ էներգետիկայի նախարարությունից ստացված՝ հումքի աճող պաշարների վերաբերյալ վիճակագրական տվյալների ֆոնին: Այս մասին հայտնում է RIA Novosti-ն:
WTI տեսակի ամերիկյան թեթև նավթի դեկտեմբերյան ֆյուչերսների արժեքը այսօր առավոտվա դրությամբ նվազել է 2.57 տոկոսով՝ հասնելով մեկ բարելի դիմաց 80.42 դոլարի:
Brent տեսակի հյուսիսծովյան նավթային խառնուրդի դեկտեմբերյան ֆյուչերսների արժեքն ընկել է 1.95 տոկոսով՝ հասնելով մեկ բարելի դիմաց 84.57 դոլարի:
ԱՄՆ-ում հումքի պաշարներն ավելացել են կանխատեսվածից շատ ավելի: Էներգետիկայի նախարարության տվյալնեով՝ նավթի կոմերցիոն պաշարները մեկ շաբաթում, որն ավարտվել է հոկտեմբերի 17-ին, ավելացել են 7.1 մլն բարելով կամ 1.9 տոկոսով՝ հասնելով 377.7 մլն բարելի, մինչդեռ կանխատեսվում էր 2.69 մլն բարելի աճ: