«Հրապրակ» թերթը գրում է. «Բնապահպանության նախարարությունն անցյալ տարվա հուլիսից պայքար է սկսել Արարատյան դաշտավայրում անօրինական արտեզյան հորերի դեմ: Դրանք Արմավիրի և Արարատի ձկնաբուծարաններում են: Գործընթացը դժվար է առաջ գնում, թեև կա նախագահի խիստ հանձնարարականը: Հորերը փակելով, բնապահպանները եկել-դեմ են առել վարչապետի եղբոր՝ Ջոնիկ Աբրահամյանի հովանու տակ գտնվող տնտեսություններին և չեն կարողանում առաջ շարժվել:
100-150 մետր խորությունից ընդերքից մաքուր, թթվածնով հարուստ ջուր է դուրս գալիս: Ժայթքում է շատրվանը, և ոչ մի տեխնիկա պետք չէ աշխատեցնել: Մնում է ընդամենը ավազաններ կառուցել և ձկները բուծել: Եվ բուծեցին: Ձկնաբուծարանների բիզնեսի զարգացման 4 տարիների ընթացքում ջրառը խայտառակ ծավալների հասավ: Ամերիկյան զարգացման գործակալությունն ուսումնասիրություն կատարեց Արարատյան դաշտավայրում և եզրակացրեց. ջրի ինքնավերականգնվող քանակը 2,5-3 անգամ գերազանցված է, բնական ինքնավերականգնումը՝ խաթարված, և եթե այսպես շարունակվի, ապա տարեցտարի ջրաքանակը կնվազի, Արարատյան դաշտը կանապատանա: Բնապահպանության նախարարությունը, ինչպես և սպասվում էր, այս 4 տարիներին աջ ու ձախ ջրօգտագործման թույլտվություններ է բաժանել: Հորատման քանակներն ավելացել են, այն դեպքում, երբ կարելի էր ինչ-որ տեխնոլոգիական լուծումների հաշվին ավելի քիչ ջրով նույն ձուկը պահել: Արագ հարստանալու հրապուրիչ այս ձևը ջրազրկվող համայնքների գյուղացիների դժգոհությունն առաջացրեց: Անցյալ տարվա սեպտեմբերին ՀՀ նախագահը հատուկ քննարկում անցկացրեց խորքային ջրերի անխնա օգտագործման հարցի շուրջ: Բնապահպանության նախարար Արամ Հարությունյանին հանձնարարեց Արարատյան դաշտավայրի անօրինական ջրառի դեմն առնել:
Բայց ապօրինի ջրօգտագործողներին պատերազմը հայտարարվեց ոչ թե Արամ Հարությունյանի, այլ նոր նախարար Արամայիս Գրիգորյանի օրոք, որի ջրերը Հովիկ Աբրահամյանի հետ նույն առվով չեն հոսում: Ապրիլին նախարար նշանակվելով, նա պարծեցավ, որ փակելու է անօրինական հորերը: Ջրի օգտագործման սակագինը բարձրացավ, տուգանքներն աճեցին, դադարեցվեց դաշտավայրում ջրօգտագործման թույլտվությունների տրամադրումը, ապօրինի խորքային հորեր փակվեցին: Հուլիսի 16-ից, երբ աշխատանքային խումբն սկսեց աշխատել, մինչ օրս, ըստ պաշտոնական տեղեկությունների, Արարատի մարզում 94 խորքային հոր է փակվել կամ կոնսերվացվել: Այս պահի դրությամբ 10 հազար 700 լիտր վայրկյանից ավելի ջուր է խնայվել, որը տարեկան մոտ 340 մլն խորանարդ մետր է: Բայց պայքարը հորատերերի դեմ այժմ փակուղի է մտել: Ամեն մի հոր փակելիս, տույժ ու տուգանք սահմանելիս, նախարարություն են զանգում Արարատի մարզի փոքր ու միջին պաշտոնյաներ: Այս պահին խումբը հասել է Ջոնիկ Աբրահամյանի հովանու տակ գործող ձկնաբույծներին, որոնք անձեռնմխելի են: Մեր տեղեկություններով, մոտ 4 ձկնաբուծական տնտեսություններ կան, որոնք նրա հովանու տակ են և անօրինական են գործում՝ «Հերիքնազ Դալլաքյան» տնտեսությունը, Մարմարաշենում «Մխչյան ֆիշ», Նորամարգում՝ «Օմեգաֆիշ», Զորակում՝ «Էկոֆիշտրենդ» ձկնաբուծարանները: Վերջին երկուսը նաև ԲՀԿ-ի հետ են կապված: Դրանցից երկուսը նախարարությունն ընդհանրապես չի կարող մտնել, որովհետև առանց համաձայնեցնելու վերևների հետ դա հնարավոր չէ: Մյուս երկու տնտեսություններ մուտքը խոչընդոտվել է բարձրաստիճանների զանգերով:
Մանրամասները՝ թերթի այսօրվա համարում
