Թուրքիան կշարունակի երկրահետախուզական աշխատանքները Կիպրոսի շելֆում՝ չնայած դրա պատճառով առաջացած ճգնաժամին: Ria Novosti-ի հաղորդմամբ՝ այս մասին հայտնել է Թուրքիայի վարչապետ Ահմեդ Դավութօղլուն:
«Barbados նավը կշարունակի սեյսմիկ հետազոտությունները: Ձեռնարկվել են նավի պաշտպանության անհրաժեշտ միջոցներ, և թող ոչ ոք դրանից ճգնաժամ չստեղծի»,- Թուրքիայի էներգետիկայի և բնական ռեսուրսների նախարարությունում ճեպազրույցի ժամանակ ասել է Դավութօղլուն:
Նրա խոսքով՝ Անկարան կիպրոսյան շելֆում սեյսմիկ հետազոտություններ անցկացնելու իրավունք ունի՝ համաձայն Թուրքիայի և Հյուսիսային Կիպրոսի միջև ստորագրված պայմանագրերի, և միշտ «մենք օգտվում ենք այդ իրավունքից»: Դավութօղլուն հայտարարել է, որ թուրք-կիպրոսցիները նույնպիսի իրավունքներ ունեն Կիպրոսի բնական հարստությունների նկատմամբ, ինչպես հույն-կիպրոսցիները:
«Երբ կիպրոսյան շելֆում սկսվեցին երկրահետախուզական աշխատանքները, Հյուսիսային Կիպրոսի Թուրքական Հանրապետության ղեկավարությունն առաջարկեց դրանք իրականացնել հույն և թուրք համայնքների կողմից բնական հարստություններն ի շահ կղզու ամբողջ բնակչության օգտագործելու համար: Բայց հունական կողմը շարունակում է մշակումները միակողմանի կարգով»,- ասել է Դավութօղլուն:
Հոկտեմբերի սկզբին Անկարան հայտարարեց, որ Հյուսիսային Կիպրոսի հայտով շելֆի տարածքում սկսում է սեյսմիկ հետազոտություն: Կիպրոսի նախագահ Նիկոս Անաստասիադիսը հայտարարել է կիպրական կարգավորման հարցով բանակցություններից դուրս գալու մասին՝ այն բանից հետո, երբ Թուրքիան Կիպրոսի ափեր ուղարկեց հետազոտական նավ և ռազմանավեր: Հունաստանն ու Կիպրոսը Թուրքիային մեղադրեցին շելֆի նկատմամբ կղզի պետության ինքնիշխանության խախտման մեջ:
