ԴԱԻՇ-ի զինյալների կողմից ամերիկացի լրագրողների մահը շատ է մտահոգել արևմտյան հասարակությանը: Սակայն համաշխարհային ԶԼՄ-ները չեն շտապում պատմել 17 իրաքցի լրագրողների ճակատագրերի մասին, ովքեր նույնպես անմարդկային կերպով սպանվել են ահաբեկիչների կողմից: Եվս մոտ 80 սիրիացի լրագրողներ ենթադրաբար պատանդվել են:
Ինչպես նշում է The Guardian բրիտանական թերթի հեղինակ Ջոն Հենլին՝ Սթիվեն Սոթլոֆի և Ջեյմս Ֆոուլիի սպանությամբ տեսագրություններն արևմտյան ԶԼՄ-ների համար դարձել են ինքնատիպ «հիթ»: Քչերը գիտեն, որ հոկտեմբերի 13-ին ԴԱԻՇ-ի զինյալները Մոսուլ քաղաքում գնդակահարել են իրաքյան ՍԱԴԱ գործակալության թղթակից Մուհամմադ Ալ-Ադիկին: Նրա մահվան մասին իրավապաշտպան կազմակերպություններին հայտնել է Քրդական դեմոկրատական կուսակցության խոսնակը: Հենլին հստակեցնում է, որ թղթակցի հարազատները վիճարկում են նրա մահվան փաստը:
Հոկտեմբերի 10-ին Սամարա քաղաքում հրապարակայնորեն գլխատվել է երեք երեխաների 37-ամյա հայր Ռաադ Մուհամմադ Ալ-Ազաուին՝ լուսանկարիչ և օպերատոր, ով ռեպորտաժներ է պատրաստել «Սամա Սալահ ալ-Դին» հեռուստաալիքի համար:
Ընդհանուր առմամբ Սիրիայում քաղաքացիական պատերազմի սկզբից երկրի տարածքում առևանգվել է ԶԼՄ-ների 80 ներկայացուցիչ, նրանցից 20-ի ճակատագիրն անհայտ է:
«Լրագրողներ առանց սահմանների» ֆրանսիական կազմակերպությունը հայտնում է, որ ԴԱԻՇ-ի վերահսկողության տակ գտնվող տարածքներում հեռուստաալիքների մեծ մասը դադարեցրել է աշխատանքը: Աշխատակիցները դառնում են առևանգումների զոհ կամ մշտապես սպառնալիքներ ստանում:
Իրաքում և Սիրիայում անհետացած լրագրողների շարքում The Guardian-ը հիշատակում է 7 ԶԼՄ-ների աշխատողների: