Կարևոր է, որ փարիզյան հանդիպմամբ ԼՂ հակամարտության կողմերի միջև վստահություն հաստատվի: Այս մասին Մամուլի ազգային ակումբի և ՀՀ-ում Ֆրանսիայի Հանրապետության դեսպանության նախաձեռնությամբ հրավիրված մամլո ասուլիսի ընթացքում ասաց ՀՀ-ում Ֆրանսիայի արտակարգ և լիազոր դեսպան Անրի Ռենոն՝ անդրադառնալով մոտակա օրերին Փարիզում կայանալիք Ալիև-Օլանդ-Սարգսյան հանդիպմանը:
Դեսպանը նախ հիշեցրեց, որ մայիս ամսին տարածաշրջան կատարած պետական այցի շրջանակում Ֆրանսիայի նախագահ Ֆրանսուա Օլանդը հակամարտող կողմերի նախագահներին հրավիրեց հավաքվել Փարիզում՝ ԼՂ հակամարտության կարգավորման բանակցություններին նոր լիցք հաղորդելու նպատակով, և առաջարկն ընդունվեց երկու երկրների նախագահների կողմից:
«Մոտակա օրերին Փարիզում կկայանա Սարգսյան-Ալիև-Օլանդ գագաթնաժողովը: Առանց հրապարակայնացնելու դիվանագիտական մանրամասներ, նշեմ միայն, որ նոր լիցք է հաղորդվելու բանակցային գործընթացին, որն ուղղված է ԼՂ հակամարտության լուծմանը:
Կարևոր է, որպեսզի երկու կողմերը կարողանան վստահության մթնոլորտ ստեղծել, որով պայմանավորված կլինի իրավիճակի փոփոխությունը շփման գծում և հայ-ադրբեջանական սահմանին:
Փարիզյան հանդիպումը կհաստատի նաև այն հանգամանքը, որ բացի բանակցված տարբերակից՝ հակամարտության կարգավորմանն այլընտրանք չկա: Հանդիպման հիմքում կլինեն երեք սկզբունքներ՝ տարածքային ամբողջականություն, ժողովուրդների ինքնորոշում, ուժի կիրառման բացառում»,- ասաց դեսպանը:
Լուսանկարը` PanARMENIAN Photo-ի