ՀՀ-ԵՄ հարաբերությունների ապագան խոստումնալից է: Այս մասին Մամուլի ազգային ակումբի և ՀՀ-ում Ֆրանսիայի Հանրապետության դեսպանության նախաձեռնությամբ հրավիրված մամլո ասուլիսի ընթացքում ասաց ՀՀ-ում Ֆրանսիայի արտակարգ և լիազոր դեսպան Անրի Ռենոն՝ անդրադառնալով Հայաստան-Եվրոպական միություն համագործակցությանը:
Դեսպանն ասաց, որ Հայաստանն ԱլԳ շրջանակում ուժեղ գործընկեր է մնում: Ըստ նրա՝ ԵՏՄ-ին անդամակցելուց հետո ևս ՀՀ-ն չի զլացել ընդգծել ԵՄ-ի հետ համագործակցությունը շարունակելու հակվածությունը:
«ՀՀ-ԵՄ գործընկերությունը շարունակելու ցանկությունը հայտարարության տեսքով արտացոլվեց Վիլնյուսում կայացած ԱլԳ գագաթնաժողովում: Հայտարարությունը հավակնոտ և ստույգ շարադրված էր, որում նշված են ՀՀ-ԵՄ ապագա համագործակցության ոլորտները: Այսօր խնդիրը հայտարարության մեջ ամրագրվածը կենսագործելու մեջ է: Եվրոպական նոր հանձնաժողովի հաստատմամբ՝ սա կդառնա քննարկման թեմա՝ ինչպես կենսագործել:
Ինչ վերաբերում է Ֆրանսիայի դիրքորոշմանը, Օլանդի կողմից հանրահռչակվեց, որ ՀՀ-ին պետք է հնարավորություն ընձեռվի ստորագրել ԱՀ-ն: Կարծում եմ՝ սա շատ հստակ հայտարարություն էր, և այն ընկալվեց ոչ միայն ՀՀ-ում, այլև դրա սահմաններից շատուշատ հեռու: ՀՀ-ԵՄ քառամյա բանակցությունների գործընթացն եկավ ապացուցելու, որ ՀՀ-ն կարողացավ քաղել դրական պտուղներ. դա նպաստավոր էր ՀՀ-ի համար: Ես կարող եմ ասել, որ ապագան խոստումնալից է»,- ասաց դեսպանը:
Լուսանկարը` PanARMENIAN Photo-ի