Վերաքննիչ քրեական դատարանի վարույթում է Արթուր Միսակյանի և Արտաշես Խաչատրյանի գործով բերված վերաքննիչ բողոքների քննությունը:
Գործը քննվել է Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ:
Արթուր Միսակյանը և Արտաշես Խաչատրյանը ջոկերի հրամանատարներ են եղել, կոչումով՝ կրտսեր սերժանտ:
Նրանք ընդգրկված են եղել հենակետում մարտական հերթապահության կազմում:
Ըստ մեղադրանքի՝ Արթուր Միսակյանը ստորադասության հարաբերությունների բացակայության պայմաններում տարբեր օրերի հալածել է նույն զորամասի ժամկետային զինծառայող, շարքային Սարգիս Ս.-ին: Մեղադրել է, թե տնից ուղարկված սննդամթերքը մենակ է ուտում, սեռական բնույթի հայհոյանք է տվել, հեռախոսի մարտկոցը չտալու համար էլ բռունցքով հարվածել է զինվորի կրծքավանդակին:
2012 թվականի նոյեմբերի 4-ին, ժամը 18-ն անց 30-ի սահմաններում, ըստ դատական ակտի, հենակետի գետնատնակում Արթուր Միսակյանը և Արտաշես Խաչատրյանը դարձյալ քննադատել են Սարգիսին, նրա արարքը՝ ուղարկված սննդամթերքը իբր թե մենակ ուտելը, համարել են չ….ն:
Ըստ դատական ակտի՝ նվաստացնող վերաբերմունքի պատճառով տուժողը, գտնվելով ընկճված հոգեվիճակում, իրեն ամրակցված ինքնաձիգից գետնատնակի դիմաց կեսգիշերին կրակոց է արձակել և ինքնասպան է եղել:
Արթուր Միսակյանը դատարանում իրեն մեղավոր չի ճանաչել: Նա ասել է, թե մինչև օրս էլ տեղյակ չէ, թե իրականում ինչ է պատահել տուժողին: Սարգիսի հետ, ըստ ամբաստանյալի, բոլոր զինծառայողները եղել են նորմալ հարաբերությունների մեջ: Ինքն ու Արտաշեսը նրան վատ չեն վերաբերվել, երբևէ չեն վիրավորել: Չի եղել դեպք, որ Սարգիսը հենակետում մենակ ուտի, ու նրան դրա համար նախատեն:
Արթուր Միսակյանը հայտարարել է, որ նախաքննական ցուցմունքներն իրականությանը չեն համապատասխանում, դրանք տվել է վախի, սպառնալիքների ու ճնշումների ազդեցության տակ:
Արտաշես Խաչատրյանն իրեն մասնակիորեն է մեղավոր ճանաչել, միայն՝ որ առանց հենակետի ավագի թույլտվության գնացել է մեկ այլ հենակետ՝ կառուցվածքին ծանոթանալու:
Նոյեմբերի 4-ին ժամը 18-ից մինչև 18-ն անց 30 րոպե եղել է այդ հենակետում, իրեն սուրճ են հյուրասիրել: Հաջորդ օրն իմացել է, որ շարքային Սարգիս Ս.-ն մահացել է: Խաչատրյանը պնդել է, որ նրանց հենակետում եղած ժամանակ ինքը Սարգիսի հետ չի խոսել, նրան չի վիրավորել, չի ծաղրել, նման բաներ անելու մտադրություն չի ունեցել:
Դատարանն արժանահավատ է գնահատել ամբաստանյալ Արթուր Միսակյանի նախաքննական ցուցմունքները:
Արթուր Միսակյանը, ըստ դատական ակտի, իր պաշտպանի ներկայությամբ որպես կասկածյալ և որպես մեղադրյալ ցուցմունքներ է տվել, թե հենակետ գնալու ճանապարհին Սարգիսն իրեն ասել է, թե տնից ուտելիք են ուղարկել, մեջը «Սնիկերս» կա, հասնեն հենակետ, միասին կուտեն:
Հաջորդ օրը հենակետում ինքը Սարգիսին ասել է, որ «Սնիկերսը» բերի՝ ուտեն, բայց Սարգիսը պատասխանել է, թե համածառայող Թովմասի հետ արդեն կերել է:
Նույն օրը ինքը զրուցել է Թովմասի հետ, ով ասել է, թե Սարգիսի հետ «Սնիկերս» չի կերել: Ստելու և շոկոլադը մենակ ուտելու համար նախատել է Սարգիսին, նա գլուխը կախել ու լռել է:
Նոյեմբերի 4-ին, ժամը 19-ի սահմաններում հերթափոխից գնացել է գետնատնակ, տեսել է, որ մեկ այլ հենակետից իրենց մոտ է եկել Արտաշես Խաչատրյանը:
Վերջինս տեղեկացել է, որ Սարգիսը տնից ուղարկված սննդամթերքը մենակ է ուտում, ասել է. «Արա՛ Սաքո, պոստում մենակ քաղցր ես ուտո՞ւմ, գիտե՞ս, որ դա չ…ն ա»: Սարգիսը չի պատասխանել: Պառկել է մահճակալին:
Արտաշեսը կանչել է նրան, պահանջել է, որ հեռախոսի մարտկոցն իրեն տա: Սարգիսը հանել է հեռախոսի մարտկոցն ու տվել է նրան:
Որոշ ժամանակ անց Սարգիսը դուրս է եկել գետնատնակից, քայլել դեպի ճաշարան: Արտաշեսը նրա հետևից հայհոյանքով պահանջել է, որ իր համար ջուր բերի: Սարգիսը ջուրը բերել է:
Ժամը 21-ի սահմաններում Արտաշեսին ճանապարհել են: Նա բացականչել է. «Արա՛ Սաքո, գոհ ե՞ս, հա՞»: Սարգիսը չի պատասխանել:
Կեսգիշերին մոտ գետնատնակի կողմից կրակոց է լսվել: Մտածել է՝ հակառակորդն է կրակել, հետո իմացել է, որ Սարգիսն ինքնասպան է եղել:
Վկա Գոռը դատարանում հրաժարվել է նախաքննական ցուցմունքներից, ասել է, թե դրանք տվել է սպառնալիքների ու վախի ազդեցության տակ: Այդ կապակցությամբ նախապատրաստված նյութերով Գոռի պնդումները հերքվել են:
Վկան նախաքննական ցուցմունքում հայտնել է, թե հոկտեմբերի 28-ին տեսել է, որ Արթուր Միսակյանը ճաշարանում հրամայական տոնով բջջային հեռախոսի մարտկոց է ուզել Սարգիսից՝ ասելով. «Տո՛ւր արա, ի՞նչ ես անում ակումուլյատորը»: Նա բռունցքով հարվածել է Սարգիսի կրծքավանդակին: Սարգիսը չի պատասխանել, հեռախոսի մարտկոցը տվել է նրան: Ինքը նախատել է Արթուրին նման վարքի համար: Նկատել է, որ Սարգիսն անտրամադիր է:
Նույն օրը նկատել է, որ Սարգիսը արևածաղկի սերմեր է չրթում դիտակետում, նրան դիտողություն է արել առանձին և անձնակազմի ներկայությամբ:
Նոյեմբերի 2-ին լսել է, որ Արթուր Միսակյանը վիրավորական արտահայտություն է արել Սարգիսի հասցեին:
Նոյեմբերի 4-ին իրենց հենակետ եկած Արտաշեսը հարցրել է՝ ամեն ինչ նորմա՞լ է: Արթուրը պատասխանել է, թե ամեն բան նորմալ է, բացի Սաքոյից, որովհետև նա ուտելիք է բերում հենակետ, գրպաններն է լցնում ու մենակ ուտում, հետո էլ ստում է, թե ակումուլյատոր չունի: Մի խոսքով՝ չ…ն է անում:
Արտաշեսը նույն որակումն է տվել, իսկ այդ ժամանակ Սարգիսը ներկա է եղել՝ իր մահճակալին պառկած:
Արտաշեսը հրամայական տոնով նրան կանչել ու հարցրել է՝ արա՛, խի՞ քեզ լավ չես պահում:
Սարգիսը չի պատասխանել, շրջվել է, որ հեռանա, Արտաշեսը հայհոյանքով նրանից ջուր է ուզել: Սարգիսը ջուրը բերել է ու զզվանքով դրել է սեղանին: Նույն օրը կեսգիշերին Սարգիսն ինքնասպան է եղել:
Դատահոգեբանական հետմահու փորձաքննությամբ փորձագետն արձանագրել է, որ Սարգիսը մահվանը նախորդող ժամանակահատվածում եղել է խիստ հուզված, ընկճված հոգեվիճակում: Արթուր Միսակյանի և Արտաշես Խաչատրյանի արարքների, վիրավորական արտահայտությունների ու հայհոյանքների և Սարգիսի կողմից ծայրահեղ քայլի դիմելու ժամանակահատվածը երկար չի եղել, նրանց վիրավորանքների և տուժողի կողմից ինքնասպանություն գործելուն նախորդող հոգեվիճակի միջև առկա է պատճառահետևանքային կապ:
Ընդհանուր իրավասության դատարանը Արթուր Միսակյանին մեղավոր է ճանաչել ու դատապարտել 4 տարի 6 ամիս ազատազրկման: Պատժի սկիզբը՝ 2012 թվականի նոյեմբերի 9-ից:
Արտաշես Խաչատրյանը մեղավոր է ճանաչվել և վերջին հաշվով դատապարտվել 5 տարի ազատազրկման: Պատժի սկիզբը՝ 2012 թվականի նոյեմբերի 10-ից:
Ընդհանուր իրավասության դատարանում կատարված քննությունից ու կայացված դատավճռից դժգոհ են մնացել ու վերաքննիչ բողոքներ են բերել ինչպես տուժողի իրավահաջորդի ներկայացուցիչը, այնպես էլ ամբաստանյալների շահերի պաշտպանը:
Նոյեմբերի 7-ին վերաքննիչ քրեական դատարանում նրանք կհիմնավորեն իրենց բերած բողոքները, կներկայացնեն իրենց դիրքորոշումները: