Թբիլիսիի քաղաքային դատարանը Վրաստանի պաշտպանության նախկին նախարար Բաչո Ախալայային դատապարտել է 7.5 տարվա ազատազրկման, նաև արգելել 3 տարի պաշտոններ զբաղեցնել պետական ծառայությունում: Այս մասին հայտնում է «Գրուզիա Օնլայն»-ը:
Բաչո Ախալայան մեղավոր է ճանաչվել Վրաստանի ՔՕ 144 (կտտանքներ) և 332 (պաշտոնեական լիազորությունների չարամիտ նպատակներով օգտագործում) հոդվածներով, իսկ 333 (պաշտոնեական լիազորությունների չարաշահում) հոդվածով անմեղ է ճանաչվել:
Գործը վերաբերում է 2006թ. հունվարի 12-ին Նավթլուգի ավտոկայանի մոտ հատուկ գործողությանը, որի ժամանակ 3 երիտասարդ է ոչնչացվել: Այն ժամանակ հետաքննությունը հայտարարել էր, որ նրանք պատրաստվում էին կազմակեպել բանտից կալանավորների զանգվածային փախուստ:
Հետաքննության տվյալներով՝ հատուկ գործողության ավարտից հետո, որը համատեղ ծրագրել են Բաչո Ախալայան և Դաթա Ախալայան (այն ժամանակ Վրաստանի ՆԳՆ Սահմանադրական դեպարտամենտի նախկին ղեկավար) պատիժների իրականացման դեպարտամենտի ղեկավարը հատուկ նշանակության ջոկատի ուղեկցությամբ գնացել է №1 բանտ: Իրավապահների վարկածով՝ նրանք այնտեղ դաժանաբար ծեծել են բանտարկյալներին:
