Երեքշաբթի Նյու Յորքում առևտրային բորսայի արդյունքներով՝ նոյեմբերին տեխասյան WTI նավթի մատակարարումների գինն ավելացել է 0.10 դոլարով (0.12%)՝ 1 բարելի դիմաց դառնալով 82.81 դոլար: Այս մասին հայտնում է TASS-ը:
Լոնդոնի Ֆյուչերսային գործարքների միջմայրցամաքային բորսայում Brent-ի մատակարարումների պայմանագրերի գինն ավելացել է 0.82 դոլարով՝ 1 բարելի դիմաց հասնելով 86.24 դոլարի:
Վերլուծաբանները նշում են, որ «սև ոսկու» արժեքի բարձրացման հիմնական պատճառը լուրերն են այն մասին, որ, ինչպես նշել է Չինաստանի Պետական վիճակագրական վարչությունը, Չինաստանի ՀՆԱ-ի աճի տեմպը 2014թ. երրորդ եռամսյակում կազմել է 7.3 տոկոս՝ նախորդ տարվա նույն ցուցանիշի համեմատ: Տնտեսագետները ենթադրում էին, որ այդ ցուցանիշը պետք է լիներ 7.2% մակարդակի վրա:
«Չինաստանի տվյալները պահպանում են շուկան»,- նշել է Tradition Energy խորհրդատվական ընկերության բրոքեր և վերլուծաբան Ջին Մաքջիլանը: